“Равшан Комиловнинг раққосаси эмасмиз” — Малика Қурбонова одамларнинг гап-сўзлари ва ҳаётидаги армонлари ҳақида

**Малика Қурбонова: "Равшан Комиловнинг раққосаси эмасмиз" — Одамларнинг гап-сўзлари ва ҳаётидаги армонлари ҳақида**

Раққоса Малика Қурбонова "Даракчи" ЁуТубе каналига берган интервюсида оила ва касб ўртасидаги мувозанатни сақлаш, саҳна фаолиятини давом эттириш режалари ҳамда оилавий муносабатларда муҳаббатнинг аҳамияти ҳақида сўзлаб берди.

**"Мен учун биринчи ўринда оилам, сўнг санъатим туради"**

Малика Қурбонова таъкидлашича, унинг ҳаётида оила биринчи ўринда туради, санъат эса иккинчи. Бироқ, у ҳозирда иккаласини ҳам тенг олиб боришга ҳаракат қилади, чунки иккаласи ҳам унинг учун муҳим ва қадрли. Раққосанинг фикрича, аёл кишига бу икки нарсани тенг олиб бориш жуда қийин, чунки аёлларнинг зиммасида оила, фарзандлар, турмуш ўртоқ, қайнона-қайнотанинг олдидаги масъулият кўпроқ. Эркак санъаткорларга бу борада осонроқ эканлигини ҳам қўшимча қилди.

У оиласини ҳам, касбини ҳам севишини, рақсдан кечиш қийинлигини айтди. Санъатга пул учун кирмаганини, инсон касбини яхши кўрса, уни тарк этиши оғриқли бўлишини таъкидлади. Санъатдан қачон кетишини ҳеч ким билмаслигини, ҳаммаси Аллоҳдан эканлигини, ҳар бир ишнинг бошланиши бўлгани каби якуни ҳам борлигини, шу сабабли ҳар бир ишида чиройли якун бўлишини исташини билдирди.

**"Ота-онам учун ҳам санъатни тарк этгим келмайди"**

Малика Қурбонова санъатни тарк этиш нияти йўқлигини айтди, чунки бу умр ва йиллар билан боғлиқ нарса. Опасининг маълум сабаблар билан санъатдан узоқлашганини, унинг бошқа йўлни танлаганини ва буни қўллаб-қувватлашини билдирди. Ўзига келадиган бўлса, ҳозирча кетиш нияти йўқлигини, қачондир барибир бунинг ҳам охири бўлишини билишини айтди. Нияти — пешонасига ёзилган бўлса, фаолиятини чиройли якун билан тугатиш, чунки кейинчалик мухлислар уларни яхши хотиралар билан эслашини хоҳлайди. Унинг фикрича, касбини яхши кўрган одам қачон тарк этишини, дам олиш ёки танаффус қилишни ўйламайди, Худо пешонасига қандай ёзган бўлса, шундай давом этаверади.

**"Равшан Комиловнинг раққосаси эмасман"**

Раққоса кўпчилик уни ва опасини Равшан Комиловнинг раққосаси деб аташини, бу жуда ғалати эшитилишини айтди. Ушбу хонанданинг клипларида рақс ижро этишлари аслида алоҳида ўйланган стратегия эмаслигини таъкидлади. Қайсидир хонанда билан қайсидир раққоса яхши тандем бўлишини, мисол учун, хонанда Имрон билан Дурдона Қурбонова, Алишер Файз билан Паризода ёки опаси билан ўзида Равшан Комиловни мисол қилиб келтирди. Буларнинг ҳаммаси тасодифий тандем эканлигини, олдиндан нима бўлишини ҳеч ким билмаслигини, тандем яхши кеца, кейинчалик яна ижодий фаолиятни давом эттиришларини, бу эса омад ва меҳнатга боғлиқ эканлигини билдирди.

**"Ҳаётимдаги оғриқли нуқтам — ота-онамни йўқотганим"**

Малика Қурбонова опаси билан биргаликдаги энг катта орзуси болалик даврига қайтиш, оила даврасида, ота-оналари билан бирга бўлишни жуда хоҳлашларини айтди. Чунки бугунги кунда улар ёнларида эмас, вафот этишган. Улар билан ўтган йилларни жуда соғинишларини билдирди. Ҳаётида биттагина оғриқли нуқтаси борлигини, бу ота-оналарини йўқотганликлари эканлигини, опаси учун ҳам худди шундайлигини таъкидлади. Ҳаётнинг қолган барча қийинчиликларини енга олишини, бунга кучи ҳам, сабри ҳам етишини, ҳақиқатда бардошли аёл эканлигини айтди. Ҳаётдаги бирдан-бир кемтиги — ота-онасизликка кўникиши қийинлиги, бу оғриқ кетиши қийин, кетолмайди ҳам. Шукр, ҳамма нарсаси: оиласи, турмуш ўртоғи, фарзандлари борлигини айтди.

Опаси билан бирга: "Қанийди бир кунгина имкон бўлса-ю, қизлик уйимизда ота-онамиз билан ҳаммамиз бирга ўтириб овқатлар тайёрлаб, дастурхон атрофида жам бўлсак эди", дейишларини, улар билан ўтказган дамларини соғинишларини билдирди. Улар оддий одамлар бўлишганини, оилалари ойликдан ойликка яшайдиган ўқитувчилар оиласи бўлганини, ўзлари емай-ичмай уларни катта қилишганини айтди. Онаси билан дадаси уларни саҳнада кўришни жуда орзу қилишганини, фарзанд катта қилишнинг қанчалар қийинлигини ўзлари она бўлиб, энди тушунаётганликларини таъкидлади.

Бугун ота-онаси учун ҳам санъатни давом эттиришни хоҳлашини, чунки онаси умрларини уларнинг келажаги учун бахшида қилганини, сёмкаларга доим улар билан борганини, керак бўлса, кечгача уларни кутиб ўтирганини, шу билан ўзларининг орзуларини унутганини айтди Малика Қурбонова.

**"Турмуш ўртоғимдан миннатдорман"**

Малика Қурбонова ёнида борлиги учун турмуш ўртоғига раҳмат айтди. Унинг турмуш ўртоғи ҳар доим қўллаб-қувватлашини, икки нафар гулдек фарзандлари борлигини, унга ишонишини, рухсат беришини, қолаверса, оғир-вазмин, яхши инсон эканлигини таъкидлади. Энг асосийси, улардан фарзандлари учун миннатдор эканлигини айтди. Чунки ўқишни битириб, ижод қилганини, бошқа қизларга нисбатан кечроқ, 26 ёшда турмушга чиққанини, турмушларининг бошида озроқ вақт фарзанд бўлмаганини, шу сабабли фарзанд неъмати унинг учун жуда қадрли эканлигини билдирди.

**"Ҳамма нарса муҳаббат асосида қурилади"**

Раққоса бахтли оила қуриш учун муҳаббатнинг ўзи етарли эканлигини айтди. Тажрибасидан келиб чиққан ҳолда, оилада муҳаббат жуда муҳимлигини, ҳар бир нарса муҳаббат асосида қурилишини таъкидлади. Масалан, касбга ҳам муҳаббат асосида эришилишини, фарзандларга ҳам меҳр-муҳаббат кераклигини айтди. Агар дунёда муҳаббат бўлмаса, ҳаёт ҳам бўлмаслигини, меҳр-муҳаббат, оқибат борки, дунё турибди. Шунинг учун оилада ўзаро муҳаббатнинг бўлиши жуда муҳим деб ҳисоблашини, чунки бир-бирини яхши кўрган оила аъзолари бир-бирларини кечира олишини, айблар, хатолар кўзга кўринмаслигини айтди. Биргаликдаги ҳаёт давомида дуч келинадиган тўсиқлар ҳам муҳаббат туфайли бирга енгиб ўтилишини, муҳаббатни, бир-бирини эъзозлашни ота-онасидан ўрганганини билдирди.