Рақобат қўмитаси рақамли хизматлар платформаларини текширмоқда
Рақобат қўмитаси стриминг, интернет ва рақамли ТВ платформаларини истеъмолчилар учун маълумотларнинг тўлиқлиги бўйича ўрганмоқда.
Рақобат қўмитаси рақамли хизматлар платформаларини текширмоқда
Ўзбекистон Рақобатни ривожлантириш ва истеъмолчилар ҳуқуқларини ҳимоя қилиш қўмитаси стриминг, интернет ва рақамли телевидение хизматларини кўрсатувчи ташкилотларнинг платформаларини ўрганишга киришди. Текширув телекоммуникация хизматлари масалалари бўйича истеъмолчилар мурожаатлари сони ортгани фонида ўтказилмоқда.
2026 йилнинг жорий даври ҳолатига кўра, телекоммуникация хизматлари бўйича истеъмолчиларнинг шикоятлари сони ўтган йилнинг шу даврига нисбатан икки бараварга ошиб, 1 мингдан ортиқ мурожаатни ташкил этди.
Таҳлиллар давомида айрим оператор ва провайдерларнинг мобил иловалари ҳамда веб-сайтларида истеъмолчилар учун зарур бўлган маълумотлар тўлиқ ҳажмда жойлаштирилмагани аниқланди. Хусусан, бу тарифлар ва нархлар, хизмат кўрсатиш шартлари, оммавий оферта ва бошқа муҳим шартларга тааллуқлидир.
Қатор ҳолатларда бундай маълумотлар давлат тилида ҳам тақдим этилмаган.
Қўмита ўрганишни очиқ манбалар асосида олиб бормоқда. Мутахассислар стриминг, интернетга уланиш ва рақамли телевидение хизматларини кўрсатувчи компаниялар платформаларида истеъмолчилар учун зарур бўлган маълумотлар қанчалик тўлиқ жойлаштирилганини, шунингдек, уларнинг қонунчилик талабларига мувофиқлигини баҳоламоқдалар.
Шу муносабат билан, тегишли хизматларни кўрсатувчи ташкилотларга мобил иловалар ва веб-сайтлардаги маълумотларнинг тўлиқлигини таъминлаш ҳамда уларни қонунчиликда белгиланган талабларга мувофиқлаштириш тавсия этилди.
Истеъмолчилар ўз таклиф ва мурожаатларини Қўмитанинг [email protected] ва [email protected] манзилларига юборишлари мумкин.
Қўмита томонидан маълум қилинишича, ўтказилган ўрганиш якунлари бўйича қўшимча маълумотлар кейинроқ тақдим этилади.