Қурилиш ишчилари кабелни узиб юборганидан кейин АҚШнинг йирик аэропортларида парвозлар кечиктирилди
Кабелга эгалик қилувчи Verizon компанияси уни «имкон қадар тезроқ» таъмирлаш устида ишлаётганини маълум қилди.
Қурилиш ишчилари кабелни узиб қўйгани сабабли АҚШнинг йирик аэропортларида рейслар кечиктирилди
Қурилиш ишчилари тасодифан авиадиспетчерлик хизмати учун зарур бўлган кабелни узиб қўйиши оқибатида АҚШ бўйлаб йирик аэропортларда юзлаб рейслар кечиктирилди.
Душанба куни тушдан кейин Нью-Йорк, Пенсильвания, Нью-Жерси ва Массачусетс штатларидаги аэропортларда самолётларнинг учишини тўхтатиш ва рейсларнинг кечиктирилиши эълон қилинди.
Транспорт соҳаси расмийларининг маълум қилишича, шикастланиш самолётларнинг учиши ва қўнишини йўналтиришга ёрдам берадиган Терминал радар яқинлашишини бошқариш (TRACON) тизимига таъсир қилган.
Кабелга эгалик қилувчи Verizon телекоммуникация компанияси АҚШ ОАВларига муаммони «иложи борича тезроқ» бартараф этиш устида ишлаётганини ва содир бўлган воқеа учун «ҳеч қандай жавобгарликни ўз зиммасига олмаслигини» маълум қилди.
FlightAware парвозларни кузатиш веб-сайтига кўра, Нью-Жерсидаги Ньюарк Либерти халқаро аэропорти бугунги авиадиспетчерлик хизматидаги узилишлардан энг кўп жабр кўрган.
Қайд этилишича, бугун ушбу аэропортдан учадиган 267 та рейс кечиктирилган, Ньюаркка йўл олган яна 257 та рейс ҳам кечикиш билан амалга оширилган.
Нью-Йоркдаги Жон Ф. Кеннеди халқаро аэропорти ва Ла-Гуардия аэропорти, шунингдек, Филадельфия халқаро аэропорти ҳам бундан зарар кўрган.
АҚШ Транспорт вазири Шон Даффининг маълум қилишича, шикастланиш Нью-Жерсида қурилиш ишларини олиб бораётган АҚШнинг шаҳарлараро темир йўл қатнови миллий оператори — Amtrak ишчилари томонидан етказилган.
Бу «телекоммуникация узилишига олиб келди» ва Федерал авиация маъмуриятини (FAA) парвозларни тўхтатишга мажбур қилди, деб ёзди Даффи Х тармоғида. Расмийларнинг билдиришича, узилган кабель аслида захира тармоғи бўлган ва хатолик фақат асосий занжир ишдан чиққанидан кейингина аниқланган.
Шарқий соҳилдаги ушбу йирик узилиш сешанба куни Нью-Йорк шаҳрида бошланадиган БМТ Бош Ассамблеяси (БМА) арафасида юз берди. Ушбу тадбирга дунёнинг кўплаб етакчилари Нью-Йорк ҳудудидаги аэропортлар орқали етиб келиши кутилмоқда.