Қозоғистонликлар 2027-йилдан Исроилга визасиз бориши мумкин бўлади
Қозоғистон фуқаролари 2027-йилдан бошлаб Исроилга визасиз бориши мумкин бўлади
Қозоғистон ва Исроил ўртасида визасиз тартиб 2027-йил бошида жорий этилиши эҳтимоли бор. Тегишли битим имзолангач, Қозоғистон Марказий Осиё ва Жанубий Кавказ мамлакатлари ичида фуқаролари Исроилга визасиз кириши мумкин бўлган илк давлатга айланиши кутилмоқда.
Икки давлат ўртасидаги келишув 2027-йил бошида имзоланиши мумкин. Исроилнинг Қозоғистондаги элчиси Ёав Бистрицкий журналистларга берган интервюсида мамлакатлар ўртасида визасиз режимни жорий этиш бўйича келишув тайёрланаётганини айтди.
Дипломатнинг сўзларига кўра, Исроил томони визаларни бекор қилишга розилик билдирган. Ҳозирда шу борадаги тегишли келишув устида иш кетмоқда.
“Биз Қозоғистон ва Исроил ўртасида визасиз режим тўғрисидаги келишув имзоланишини кутмоқдамиз. Уни Исроил ташқи ишлар вазирининг ташрифи давомида имзолаш режалаштирилган. Ҳозир бу борада иш олиб боряпмиз. Аниқ сана ҳозирча йўқ, бироқ бу 2027-йил бошида амалга ошишига умид қилмоқдамиз”, деди Бистрицкий.
Унинг таъкидлашича, келишув кучга киргач, Қозоғистон фуқаролари Исроилга визасиз бориш имконига эга бўлади.
“Қозоғистон фуқаролари Марказий Осиё ва Жанубий Кавказда Исроилга умуман визасиз ташриф буюриш имкониятига эга бўладиган биринчи давлат фуқаролари бўлади. Исроил бу босқичга аллақачон рози, ҳозир эса келишув имзоланишини кутмоқдамиз”, дея қўшимча қилди элчи.
Жорий йилнинг январ ойида Исроил ташқи ишлар вазири Гидеон Саар расмий ташриф билан Остонага келиб, Қозоғистон ташқи ишлар вазири Ермек Кошербаев билан учрашган эди. Ўшанда Қозоғистон Ташқи ишлар вазирлиги икки давлат туризмни ривожлантириш мақсадида ўзаро визасиз режим жорий этишга тайёрланаётганини билдирган эди.
2026-йилнинг апрел ойида Исроил президенти Исаак Герсог Қозоғистон президенти Қосим-Жўмарт Тўқаевнинг таклифига биноан Остона шаҳрига расмий ташриф билан келган эди.
Ташриф якунида икки давлат миллий паспорт эгалари учун визасиз режим тўғрисидаги ҳукуматлараро битимни тузиш нияти ҳақидаги меморандумни имзолаган.
Шунингдек, Исроил томони Қозоғистон билан тўғридан тўғри авиақатновларни йўлга қўйишга қизиқиш билдирган. Герсог бундай рейслар савдо ва бизнес алоқаларини ривожлантиришга хизмат қилишини таъкидлаган эди.
Қозоғистоннинг Исроил билан муносабатларидаги муҳим қадамлардан бири Иброҳим келишувига қўшилиш қарори бўлди.
2025-йил 6-ноябр куни АҚШ президенти Доналд Трамп Қозоғистон Иброҳим келишувларига қўшилишини эълон қилди. Трампнинг айтишича, у Қозоғистон президенти Қосим-Жўмарт Тўқаев ва Исроил бош вазири Бинямин Нетаняху билан телефон орқали суҳбатлашган. У Қозоғистонни ўзининг иккинчи президентлик муддати давомида Иброҳим келишувларига қўшилган биринчи давлат деб атаган.
Орадан кўп ўтмай, Қозоғистон ташқи ишлар вазирлиги мамлакатнинг Иброҳим келишувларига қўшилишини расман тасдиқлаганди. Остона бу қарор Қозоғистоннинг мувозанатли ва тинчликпарвар ташқи сиёсатига мос келишини билдирган.
Шу билан бирга, Қозоғистон Яқин Шарқдаги можарони халқаро ҳуқуқ, БМТ резолюциялари ва икки давлат — икки халқ тамойили асосида ҳал қилиш тарафдори эканини таъкидлаган.
2026-йил январида Қозоғистон президенти Қосим-Жўмарт Тўқаев ҳам бу қарорни изоҳлаб, Иброҳим келишувларининг пайдо бўлишини Доналд Трампнинг дипломатик ташаббуси сифатида баҳолаган ва Қозоғистоннинг уларга қўшилиш қарорини расман эълон қилган.