Қозоғистонлик теннисчи жаҳон рейтингида пешқадамга айланди
Қозоғистонлик теннисчи жаҳон рейтингида етакчига айланди
Қозоғистонлик теннисчи Елена Рибакина АҚШ очиқ чемпионати яримфиналига чиқиб, фаолиятида илк бор ВТА рейтингининг биринчи поғонасига кўтарилади. Бу ҳақда Халқаро аёл теннисчилар ассоциацияси (ВТА) матбуот хизмати маълум қилди.
Манбага кўра, Рибакина 99 ҳафта давомида рейтингда пешқадам бўлган Арина Сабаленканинг ўрнини эгаллайди. Сабаленка шу даврда 2025-йилги Аустралиан Опен ва АҚШ Очиқ чемпионатида ғолиб чиқиб, икки йил кетма-кет мавсумни рейтинг етакчиси сифатида якунлаган эди.
Еленанинг Ню Ёркдаги турнирдаги иштироки ҳам савол остида бўлган. У мусобақа олдидан чап оёқ тўпиғидан жароҳат олганди. Шунга қарамай, қозоғистонлик теннисчи дастлабки тўртта учрашувда бирорта сетни бой бермай, чорак финалга йўл олди. Кейин эса хитойлик Чжен Синвенни 3:6, 6:1, 6:4 ҳисобида мағлуб этиб, фаолиятида илк бор УС Опен яримфиналига чиқди.
Шу тариқа Рибакина ВТА тарихида рейтингнинг биринчи поғонасига кўтарилган 30-аёл теннисчи бўлади. Шунингдек, у Қозоғистон тарихида аёллар ўртасидаги жаҳон рейтингида биринчи ўринни эгаллаган илк теннисчига айланади.
27 ёшли Рибакина ВТА рейтинги тарихида биринчи поғонага чиққан иккинчи энг катта ёшли теннисчи бўлади. 2016-йилда 28 ёшли германиялик теннисчи Анжелик Кербер фаолиятида илк бор рейтинг пешқадамига айланган.
Ҳозирча Рибакина АҚШ Очиқ чемпионатидаги иштирокини давом эттирмоқда. Турнир якунлангач, у расман ВТА рейтингида биринчи ўринга кўтарилади.
Маълумот учун, Елена Рибакина 27 ёшда. Қозоғистонлик теннисчи Аёллар теннис ассоциацияси (ВТА) турнирларининг яккалик баҳсларида жами 8 та титулни қўлга киритган. Рибакина 2 марта “Катта дубулға” турнирида — “Уимблдон” (2022) ҳамда Австралия очиқ чемпинати (2026) бош совринига эга чиққан. У яккалик баҳсларида 2020-йилги Токио Олимпиадасида 4-ўринни эгаллаган.
Бундан ташқари, Рибакина сўнгги 52 ҳафта давомида топ-10 вакилларини 16 марта мағлуб этган. У мазкур даврда 1569 та тўғридан-тўғри очко келтирган зарба ва 394 та эйс қайд этиб, ҳар икки кўрсаткич бўйича ВТА турида энг яхши натижани кўрсатган.
АҚШ очиқ чемпионати мавсумдаги тўртинчи “Катта дубулға” турниридир. Мусобақа қаттиқ қопламали кортларда ўтказилмоқда ва 13-сентябр куни якунланади. Турнирнинг умумий мукофот жамғармаси 108 миллион долларни ташкил этади.
Аёллар ўртасидаги яккалик баҳсларининг амалдаги ғолиби беларуслик Арина Сабаленка ҳисобланади.