Қозоғистонда ҳаво ҳарорати 111 йиллик рекордни янгилади

Қозоғистонда июл ойида ҳаво ҳарорати бўйича 111 йиллик рекордлар янгиланди. Тенгриневс хабарига кўра, Туркистонда ҳарорат 47,6 даражага етган бўлса, Чимкентда 111 йил аввал ўрнатилган рекорд кўрсаткичлар ортда қолдирилди.

Июл ойида мамлакатнинг аксарият ҳудудларида ҳаво ҳарорати иқлимий меъёрдан 1-4 даражага юқори бўлди. Баъзи жойларда эса ёғингарчилик одатдагидан 1,3-4 баравар кўп ёғди. Хусусан, Туркистон вилоятининг Жетисай туманида бир ойлик ёғин миқдори иқлимий меъёрдан 15 баравар ошиб кетди.

**Узоқ йиллик ҳарорат рекордлари янгиланди**

Июл ойида рекорд даражадаги иссиқлик нафақат Қозоғистон жанубида, балки шимол, шарқ ва марказий ҳудудларда ҳам қайд этилди. Олмаотада 16-20-июл кунлари энг иссиқ давр кузатилиб, кетма-кет бир нечта рекордлар янгиланди:

* 16-июл куни ҳаво ҳарорати 38 даражага етиб, 2015-йилдаги 37 даражали рекордни ортда қолдирди.

* 17-июл куни ҳарорат 39,2 даражага кўтарилиб, 1945-йилда қайд этилган 37,4 даражали рекордни янгилади.

* 18-июл куни ҳаво 40 даражагача исиди, бу 1997-йилдаги 39,7 даражали рекорддан юқори бўлди.

* 20-июл куни эса ҳарорат 41,5 даражага етиб, 2007-йилдаги 39,5 даражали рекордни ортда қолдирди.

Шу тариқа, бир неча кун ичида Олмаотада тўртта ҳарорат рекорди янгиланди.

**Чимкентда 111 йиллик ҳарорат рекорди ўрнатилди**

Олмаотадан ҳам юқорироқ ҳарорат Чимкентда кузатилди. 16-20-июл кунлари бу ерда ҳаво 45,2 даражагача исиди. Таққослаш учун, 1915-йилнинг шу даврида ҳарорат 41,1 ва 40,1 даражани ташкил этган. 2019-йил 19 ва 20-июл кунлари эса мос равишда 40,2 ва 40,7 даража қайд этилган. Бу кўрсаткичлар Чимкентда 111 йил аввал ўрнатилган рекордларнинг янгиланганини кўрсатади.

Экстремал иссиқлик мамлакатнинг бошқа ҳудудларида ҳам кузатилди:

* 14-июл куни Остонада ҳаво ҳарорати 38,6 даражагача кўтарилди. Бу 1992-йилда қайд этилган 35,3 даражали рекорддан юқори бўлди.

* Уст-Каменогорск шаҳрида 2-июл куни ҳаво 34,4 даражагача исиб, 1969-йилдаги 33,9 даражали рекордни янгилади. 16-июл куни эса ҳарорат 39,7 даражага етиб, яна 1969-йилда қайд этилган 37,2 даражали рекорд ортда қолди.

**Қизилўрда ва Туркистонда ҳам рекорд даражадаги иссиқлик кузатилди**

17-июл куни Қизилўрда шаҳрида ҳаво ҳарорати 45,2 даражага етди. Натижада 2015-йилда қайд этилган 43,6 даражали рекорд янгиланди. 18-июл куни эса Туркистон шаҳрида ҳаво 47,6 даражагача исиди. Бу 2019-йилда қайд этилган 43,7 даражали рекорддан 3,9 даражага юқори бўлди.