Қозоғистонда чечен фаоли икки марта жонига қасд қилишга уринди. Бунга унинг Россияга топширилиш хавфи сабаб бўлди
Қозоғистонда чечен фаоли икки бор жонига қасд қилишга уринди. Бунга унинг Россияга топширилиш хавфи сабаб бўлди
Чеченистонлик фаол Мансур Мовлаев бир ҳафта ичида иккинчи марта ўз жонига қасд қилишга уринган, деб хабар бермоқда Россиянинг урушга қарши қўмитаси.
Биринчи марта Мовлаев 15-сентябр куни Олмаота тергов ҳибсхонасида ўзини ўлдиришга уринган — у ерда фаол сўнгги бир ярим йилдан бери Россияга экстрадиция қилинишини кутиб келмоқда. Мовлаевга ёрдам кўрсатилган ва у шифохонага ётқизилган. Бироқ у ерда фаол яна ўз жонига қасд қилишга уринган.
Биринчи уринишидан кейин Мовлаев хат қолдириб, унда адолацизликдан чарчаганини, Россияда уни қийноқлар ва ўлим хавфи кутаётганини ёзган эди.
Мансур Мовлаев Чеченистон раҳбари Рамзан Қодировни кескин танқид қилгани, республикадаги инсон ҳуқуқлари бузилиши ва сиёсий репрессияларга қарши чиқишлари билан танилган. 2020-йилда фаол Россия Жиноят кодексининг гиёҳванд моддалар савдоси учун жавобгарликни назарда тутувчи 228-моддасига асосан уч йилга озодликдан маҳрум этилган. Чечен мухолифатчиларига кўра, иш сохта бўлган. 2022-йилда Мовлаев шартли равишда озод қилинган, аммо тез орада ўғирлаб кетилиб, Чеченистон полиция бўлимларидан бирига олиб кетилган. Шунга қарамай, у ҳужжатларисиз қочиб, Қирғизистонга етиб олишга муваффақ бўлган. Россия уни федерал қидирувга берган.
Қирғизистонда фаол чегарани ноқонуний кесиб ўтишда гумонланиб, ушланган ва бир муддат колонияда жазо ўтаган. Мовлаев ўз ватанига мажбуран чиқариб юборилиши мумкинлигидан қўрқиб, республикани ҳам тарк этган.
2025-йил май ойида эса фаол Олмаотада қўлга олинган. Қозоғистон ҳукумати унга бошпана беришни рад этган, оқибатда Мовлаев 2025-йил май ойидан бери экстрадиция ҳибсхонасида сақланмоқда.