Қозоғистон Исроилга 500 минг тонна буғдой етказиб бермоқчи
Маҳсулотлар Озарбайжон ва Грузиядан ўтувчи транспорт йўлаги ёки Болтиқ денгизи портлари орқали етказиб берилиши мумкин.
Қозоғистон Исроилга 500 минг тоннагача буғдой юборишни режалаштирмоқда.
Қозоғистон Исроилга 500 минг тонна буғдой етказиб бериш имкониятини кўриб чиқмоқда. Маҳсулотлар Озарбайжон ва Грузия орқали ўтадиган транспорт йўлаги ёки Болтиқ денгизи портлари орқали жўнатилиши мумкин. Бу ташаббус Қуддусда ўтказилган Савдо-иқтисодий ҳамкорлик бўйича ҳукуматлараро комиссия йиғилишида илгари сурилган. Таклифни “Озиқ-овқат корпорацияси” бошқаруви раиси ўринбосари Самат Тенбаев билдирган.
Қозоғистон томони Исроил бозорининг эҳтиёжларини инобатга олиб, 200 минг тоннадан 500 минг тоннагача буғдой ва бошқа қишлоқ хўжалиги маҳсулотларини етказиб бериш бўйича узоқ муддатли шартномалар тузишга тайёрлигини билдирган.
Қишлоқ хўжалиги вазирлиги маълумотига кўра, Қозоғистон маҳсулотлари дунёнинг 80 дан ортиқ мамлакатига, жумладан Европа, Шимолий Африка, Яқин Шарқ ва Жануби-Шарқий Осиё давлатларига экспорт қилинади. Октябр охирида вазирлик Қозоғистон фермерлари йиғим-терим якунларига кўра 24,3 миллион тонна ғалла етиштирганини маълум қилди. Бу кўрсаткич ўтган йилгидан 10 фоизга кам.
Маълумот учун, 2025-йилда Ўзбекистонга 8 та хорижий давлатдан қиймати 124,6 миллион доллар бўлган 422,6 минг тонна буғдой уни импорт қилинган. Энг йирик етказиб берувчи Қозоғистон бўлиб, 399,8 минг тонна маҳсулот юборган. Кейинги ўринларда Россия ва Тожикистон туради — мос равишда 22,1 минг ва 425 тонна.