Қозоғистон – Қирғизистон чегарасида юк машиналари тўпланиб қолди
Қозоғистоннинг Жамбил вилоятидаги «Қорасу» автомобил ўтказиш пунктида Қирғизистон томон ҳаракатланаётган 400 га яқин юк машинаси тўпланиб қолди. Расмийлар вазиятни юк ташиш ҳажмининг мавсумий ўсиши ҳамда юк транспорти ҳаракатига жорий этилган ҳарорат чекловлари билан изоҳлаяпти.
Қозоғистон-Қирғизистон чегарасида юк машиналари тирбандлиги юзага келди. Қозоғистон Давлат даромадлари қўмитасининг хабар беришича, Жамбил вилоятидаги "Қорасу" автомобил ўтказиш пунктида Қирғизистон йўналиши бўйича ҳаракатланаётган 400 га яқин юк машинаси тўпланиб қолган.
Ушбу вақтинчалик тирбандлик бир нечта омиллар билан боғлиқ. Хусусан, халқаро юк ташувларининг мавсумий ўсиши ҳамда Қирғизистон ҳудудида юк транспортлари ҳаракатига жорий этилган ҳарорат чекловлари юк машиналарининг тўпланишига сабаб бўлган.
Навбатни қисқартириш мақсадида Қозоғистон томони чегара хизматлари фаолиятини кучайтирган ва баъзи юк машиналарини қўшни назорат пунктларига йўналтира бошлаган. Шунингдек, вазиятни мувофиқлаштириш бўйича Қирғизистон идоралари билан музокаралар олиб борилмоқда.
Узоқ кутиш вақти қўшимча харажатларга, етказиб бериш муддатларининг чўзилишига олиб келиши ва минтақавий савдога салбий таъсир кўрсатиши мумкин.