Қорақалпоғистонда 250 га яқин фуқаро картасидан 3 млрд сўмга яқин пул ўғирлаган гуруҳ қўлга олинди
Қорақалпоғистонда 250 га яқин фуқаронинг 3 млрд сўмга яқин пулини ўғирлаган гуруҳ қўлга олинди. Улар Телеграмъда вирус файл тарқатиб, пластик карта маълумотларини қўлга киритган ва пулларни хорижга ўтказиб келган. Шунингдек, яна 8 та шундай гуруҳ ушланди.
Қорақалпоғистонда қарийб 250 нафар фуқаронинг картасидан 3 млрд сўмга яқин пул ўғирлаган гуруҳ фош этилди
Қорақалпоғистонда ўтказилган оператив-техник тадбирлар давомида 250 нафар фуқаронинг банк карталаридан қарийб 3 миллиард сўм маблағни ўзлаштирган гуруҳ фаолиятига чек қўйилди, дея хабар бермоқда ИИВ Кибержиноятларга қарши курашиш департаменти.
Маълум бўлишича, гуруҳ таркиби 22 ёшли уч нафар нукуслик йигитдан иборат бўлган. Улардан бири муқаддам ўғрилик жинояти учун судланган М. исмли фуқаро Телеграмъдаги ёпиқ каналлар орқали хорижликлар билан алоқа ўрнатган.
Суриштирувлар давомида гуруҳ аъзолари 2025-йилнинг августидан буён хориждаги шериклари юборган АПК вирусли дастурларини тарқатиш билан шуғуллангани аниқланган. Фуқаролар ушбу зарарли файлни юклаб олганидан сўнг, уларнинг банк карталари маълумотлари ва баланси ҳақидаги ахборот уларга келиб тушган.
Олинган маълумотлар асосида М. ва унинг шериклари Е. ҳамда А. исмли шахслар фуқароларнинг пластик карталарини янги дастурларга улаб, СМС кодларни қўлга киритган ва маблағларни бошқа карталарга ўтказиб олган. Шундан сўнг пулларни хориждаги шерикларига юбориб, ўз хизматлари учун 15 фоизгача УСДТ (криптовалюта) кўринишида улуш олган.
Шунингдек, гуруҳ аъзолари компютерхоналардаги ёшларни ва бошқа шахсларни 50 минг сўмдан 300 минг сўмгача бўлган моддий манфаатдорлик эвазига мобил тўлов иловаларидан верификациядан ўтказиш, уларнинг номига виртуал банк карталари ва СИМ-карталарни расмийлаштиришга жалб қилган.
Тергов маълумотларига кўра, гуруҳ аъзолари умумий ҳисобда 250 га яқин фуқаронинг 3 миллиард сўмга яқин маблағини талон-торож қилган.
ИИБ вакилининг таъкидлашича, улардан бири бу йўлдан қайтмоқчи бўлганида, хориждаги шериклари томонидан унга нисбатан таҳдид ва босимлар ўтказилган, шахсий маълумотлари тарқатиб юборилган.
Мазкур ҳолат юзасидан Жиноят кодексининг тегишли моддалари билан жиноят иши қўзғатилиб, дастлабки тергов ҳаракатлари якунланган. Тўпланган ҳужжатлар жазо қўллаш учун жиноят ишлари бўйича судга юборилган.
ИИВ департаментининг қўшимча қилишича, ўтказилган тадбирлар давомида шу каби йирик миқдордаги фирибгарликлар билан шуғулланиб келган яна 8 та гуруҳ қўлга олинган. Ушбу гуруҳларнинг 7 таси Қорақалпоғистонда, 1 таси эса бошқа вилоятда истиқомат қилувчи ёшлардан иборат. Ҳозирда уларга нисбатан тергов ҳаракатлари давом этмоқда.