«Қонли жума»: Полшада қотиллик режалаштиришда гумонланган талаба ушланди
Полшада 21 ёшли украиналик талаба ирқий адоват ва «Қонли жума» интернет челленжида қатнашиш истаги билан тасодифий бир кишини ўлдиришга тайёргарлик кўришда гумонланмоқда. У уч ойга қамоққа олинган.
«Қонли жума»: Полшада қотилликни режалаштиришда гумон қилинган талаба қўлга олинди
ДВ хабарига кўра, 12-октабр куни Люблин округ прокуратураси Люблин католик университети талабаси Ярослав F.ga нисбатан олиб борилаётган тергов ҳақида маълумот берган.
Прокуратура маълумотига кўра, гумонланувчи тасодифан танланган бир кишига пичоқ билан ҳужум қилиб, уни ўлдиришни режалаштирган. Терговчилар эҳтимолий жиноят сабабларини ирқий нафрат ҳамда Блоодй Фридай — «Қонли жума» номли онлайн челленжда қатнашиш истаги билан боғламоқда.
Тергов университет раҳбариятининг мурожаатидан кейин бошланган. Олийгоҳ ходимларидан бири семинар қатнащилари бошқа бир талабанинг тажовузкор ва экстремистик баёнотларидан хавотир билдирганини маълум қилган.
Прокуратура таъкидлашича, Ярослав Ф. машғулотлар давомида жиноятларни, жумладан, ирқий адоват асосида содир этилган қилмишларни мақтаган. Шунингдек, у челленж доирасида одамларни танламасдан ўлдириш ниятини билдирган ва бошқа бир талабани ҳам шундай ҳаракатларга ундаган.
Терговга кўра, унинг учта пичоғи бўлган: биттасини ўзи билан олиб юрган, улоқтириш учун мўлжалланган яна иккитаси эса уйидан топилган. Ярослав Ф. қўшимча даромад учун таксичилик қилаётган пайтда ушланган.
Прокуратура талабанинг аввал психиатрия муолажасидан ўтмаганини, курсдошлари орасида эса босиқ ва мулоҳазали инсон сифатида танилганини билдирган. АФП агентлиги хабарига кўра, айби исботланса, унга 15 йилгача озодликдан маҳрум қилиш жазоси тайинланиши мумкин.
Полшада сўнгги кунларда таълим муассасаларида бир нечта ҳужум ҳам қайд этилган. 10-октабр куни Варшавадаги катталар учун таълим муассасалари ҳудудида 21 ёшли ўқувчи икки нафар 17 ёшли қиз ва 24 ёшли аёлни жароҳатлаган. Жабрланганлардан бири шифохонага ётқизилган, қолган иккисига жойида ёрдам кўрсатилган.
8-октабр куни Лещидол-Новинидаги бошланғич мактабда 15 ёшли ўсмир уч кишига ҳужум қилган. Жабрланганлардан бири — мактабнинг 37 ёшли ходими вафот этган. 7-октабрда эса Остроленкадаги мактабда 19 ёшли йигитнинг ҳужуми оқибатида тўққиз киши жароҳатланган.
Полша бош вазири Доналд Туск ушбу ҳодисаларни шарҳлар экан, ижтимоий тармоқлар ва видеоўйинлар ўсмирларни ҳужумларга ундаган бўлиши мумкинлигини айтган. Бу унинг баҳоси бўлиб, келтирилган хабарда мазкур ҳодисаларнинг Ярослав Ф. иши ёки «Қонли жума» челленжи билан боғлиқлиги тасдиқланмаган.