Қўқонда Мандалаки уйи 2027 йилдан бошлаб реставрация қилинади
Маданий мерос агентлиги 1903 йилга оид меъморчилик ёдгорлигини реставрация қилишни республика бюджети маблағлари ҳисобидан бошлашни режалаштирмоқда.
2027 йилдан Қўқонда Мандалаки уйини реставрация қилиш режалаштирилмоқда
Фарғона вилоятининг Қўқон шаҳрида жойлашган «Мандалаки уйи» меъморий ёдгорлигини реставрация қилиш ишларини 2027 йилда бошлаш ниятидалар. Ишларни молиялаштириш республика бюджетидан амалга оширилади. Бу ҳақда Маданий мерос агентлиги хабар беради.
Бино 1903 йилда қурилган бўлиб, Ўзбекистоннинг тарихий-меъморий меросини акс эттирувчи объектлар қаторига киради.
«Мандалаки уйи» Ўзбекистон Республикаси Вазирлар Маҳкамасининг 2019 йил 4 октябрдаги 846-сонли қарори билан Моддий маданий мероснинг кўчмас мулк объектлари миллий рўйхатига киритилган.
Объект давлат мулкида бўлиб, тезкор бошқариш ҳуқуқи асосида Фарғона вилояти Маданий мерос бошқармасига бириктирилган.
Маданий мерос агентлиги таъкидлашича, реставрация ишлари бинонинг тарихий меъморий қиёфасини сақлаб қолиш, унинг конструктив мустаҳкамлигини таъминлаш ва тарихий қийматини келажак авлодларга етказишга қаратилган.
Идора, шунингдек, фуқароларни интернетда тарқатилаётган асоссиз хабарларга ишонмасликка чақирди.