Қизларни иш ваъдаси билан алдаганликда гумонланган аёл Истанбулда ушланди
Ёш қизларни юқори маошли иш ваъдаси билан Туркияга олиб бориб, паспортларини олиб қўйган ҳолда эксплуатация қилганликда гумонланаётган ўзбекистонлик аёл Истанбулда қўлга олинди. Узоқ вақтдан буён халқаро қидирувда бўлган шахс Ўзбекистоннинг ваколатли органларига топширилди.
Қизларни иш ваъдаси билан алдаганликда гумон қилинган аёл Истанбулда қўлга олинди
Ўзбекистон ва Туркия ҳуқуқни муҳофаза қилувчи органлари ҳамкорлигида ўтказилган тезкор-қидирув тадбирлари давомида 1981-йилда туғилган Ўзбекистон фуқароси Н.E.ning қаерда эканлиги аниқланган.
Маълум қилинишича, у Жиноят кодексининг 135-моддаси — одам савдосининг 3-қисми билан айбланиб, қидирувга берилган эди.
Н.Э. ёш қизларни юқори даромадли ишга жойлаштириш ваъдаси билан алдаб, Туркияга олиб борганликда гумон қилинмоқда. Хабарда қайд этилишича, у қизларнинг паспортларини олиб қўйиб, уларни эксплуатация қилган бўлиши мумкин.
Истанбулда ушланган аёл белгиланган тартибда Ўзбекистоннинг ваколатли органларига топширилган. Ҳозирда унга нисбатан тергов ва процессуал ҳаракатлар давом эттирилмоқда.
Хабарда фуқаролар хорижда юқори маошли иш ваъда қилаётган шахсларнинг алдовларидан огоҳ бўлишга чақирилган.