Қизимга ўлим олиб келувчи гиёҳванд моддаларни сотган «заҳар савдогари» дўзахда чирисин
Луиз Нанннинг қизи интернет орқали заҳарли кимёвий моддалар сотган канадалик Кеннет Лоудан гиёҳванд моддалар сотиб олган.
Қизимга ўлим келтирувчи дориларни сотган «заҳар сотувчи» дўзахда чирисин
Иможен Нанн интернет орқали буюртма қилган заҳарни истеъмол қилганидан кейин вафот этди
Кейинчалик ўз жонига қасд қилган одамларга заҳарли кимёвий моддалар сотган канадалик эркак «дўзахда чириши» керак, деди ўз жонига қасд қилган британиялик аёлнинг онаси.
Имми номи билан танилган Иможен Нанн 2023 йил январ ойида 25 ёшида Кеннет Лоудан интернет орқали дори сотиб олганидан кейин вафот этган.
Лоу интернетдаги ўз жонига қасд қилиш форумларида одамлар билан учрашганидан кейин Канадада ўз жонига қасд қилишга ёрдам бериш бўйича 14 та банддан иборат айбловни тан олди. Аммо Буюк Британиядаги 80 га яқин ўлим ҳолати ҳам у билан боғлиқ.
Бироқ, Канада расмийлари билан тузилган айбловни тан олиш тўғрисидаги келишувга кўра, Лоу Буюк Британияда ёки бирор бир Британия фуқаросининг ўлими бўйича айбловга дуч келмайди.
Иможеннинг онаси Луиз Нанн BBC телеканалига берган интервюсида унинг бу ерда адолат олдида жавоб бермаслигидан ғазабда эканини айтди. «Менимча, оилалар сифатида бизни умидсизликка учратишди. Болаларимизни умидсизликка учратишди», деди у BBC’га.
Бу воқеа Буюк Британия оилаларининг баёнотлари шу ҳафта Онтарио судида ўқиб эшиттирилиши арафасида юз бермоқда.
«Менимча, оилалар сифатида бизни умидсизликка учратишди», деди Луиз Нанн BBC’га
Шу йилнинг май ойида Лоу прокурорлар билан келишув доирасида Канадада ўз жонига қасд қилишга ёрдам бериш бўйича 14 та банддан иборат айбловга иқрор бўлди, прокурорлар эса қотиллик бўйича янада жиддийроқ айбловларни қайтариб олишди.
Расмийларнинг айтишича, собиқ ошпаз бўлган Лоу 40 та давлатдаги ўз жонига қасд қилиш форумларида учратган қабул қилувчиларга 1200 га яқин заҳарли моддалар солинган жўнатмаларни сотган. Жўнатмаларнинг тахминан тўртдан бир қисми Буюк Британияга юборилган.
Ўша пайтда гапирган британиялик қурбонларнинг оилалари Буюк Британия прокурорлари Лоуга 79 нафар британияликнинг ўлими бўйича айблов қўймаганидан ғазабда эканликларини айтишди, расмийларнинг таъкидлашича, бу ўлимлар у етказиб берган маҳсулотлар билан боғлиқ.
Собиқ ошпаз бўлган Лоу ўз жонига қасд қилиш форумларида учратган қабул қилувчиларга 1200 га яқин заҳарли моддалар солинган жўнатмаларни сотган
Буюк Британия Қироллик прокуратура хизмати (CPS) Канада билан айбловни тан олиш тўғрисидаги келишувга Лоунинг жазоси Британиядаги ўлимларни ҳисобга олиши асосида рози бўлганини билдирди.
BBC томонидан кўрилган хатда CPS Лоунинг Канададан Буюк Британияга экстрадиция қилинишига эътироз билдириши мумкинлигидан хавотирда бўлгани ва Буюк Британия қурбонларини Канададаги ҳукм чиқариш жараёнига киритиш адолатга эришишнинг «энг тез ва энг самарали йўли» экани кўрсатилган.
Шу ҳафта Канада суди Буюк Британиялик жабрланувчиларнинг баёнотларини тинглайди. Улар кейинроқ белгиланадиган ҳукм чиқаришда ҳисобга олинади. Бу Британия оилалари учун ҳуқуқий жараёнда ўз овозига эга бўлишнинг ягона имкониятидир.
Бироқ, BBC билан суҳбатда Нанн унинг жабрланувчи сифатидаги баёнотининг бир қисми расмийлар томонидан таҳрир қилинганини (ўчирилганини) айтди.
«Менимча, бизда баёнотимизда айтмоқчи бўлган сўзларимизни айтиш имконияти бор эди, лекин ҳозир менга охирги хатбошимни ўчириб ташлашганини айтишди, бу эса бизнинг ягона имкониятимиздек туюлганди».
Унда у Лоу унинг ҳаётини барбод қилганини айтганди. «Сиз менинг бутун дунёимни вайрон қилдингиз. Агар Имми ҳозир шу ерда бўлганида, менга нима дейишини аниқ билардим, лекин мен Имми эмасман ва сизни ҳеч қачон кечирмайман».
Имми бутунлай кар эди ва ижтимоий тармоқларда ўз ҳаётига ҳажвий нигоҳ билан қараган постларини баҳам кўрарди.
«У ижтимоий тармоқларни топди ва мен унинг қанчалик бахтли бўлганини эслайман», деди Нанн. «У ғамгин вазиятни ижобий томонга ўзгартиришга ҳаракат қилди ва ҳаётидаги барча салбий нарсаларни ижобийроқ нарсага айлантиришга уринди.
«Бу уни ўзгартирди, ишончи қайтди. Ижтимоий тармоқлар унинг ўзига бўлган ишончини ва дўстлик алоқаларини мустаҳкамлади».
BBC сўровига жавобан CPS шундай деди: «Канада судларида мақбул бўлишини таъминлаш учун Канада адвокатининг тавсиясига биноан жабрланувчиларнинг баёнотларига баъзи таҳрирлар киритилмоқда.
«Биз Кеннет Лоу содир этган жиноятнинг чуқур таъсирини тан оламиз ва барча жабрланувчилар ҳамда яқинларини йўқотган оилалар ҳукм чиқариш жараёни орқали ўз шахсий кечинмаларини баҳам кўриш имкониятига эга бўлишларини таъминлаш устида ишлаяпмиз».