Қирғизистон 50 йил ичида ўрмонларининг қарийб 90 фоизини йўқотди

Қирғизистон 50 йил ичида ўрмонларининг қарийб 90 фоизидан айрилди

Қирғизистон сўнгги 50 йил давомида ўрмон майдонларининг тахминан 90 фоизини йўқотган. Бу маълумот мамлакатнинг 2035-йилгача мўлжалланган Миллий мослашиш режасига киритилган. Ҳужжат лойиҳаси жамоатчилик муҳокамасига чиқарилди.

Ҳужжат муаллифлари бу масала фақат экологик муаммо эмаслигини таъкидлашади. Ўрмонларнинг камайиши сел ва кўчкилар хавфини бевосита оширади. Бундан ташқари, у сув ҳавзалари ҳолатини ёмонлаштиради ҳамда йўллар, кўприклар ва қишлоқ хўжалиги ерларига етадиган зарарни кўпайтиради.

Ҳужжатда ўрмонлар ва тоғ экотизимлари давлатнинг табиий инфратузилмаси сифатида тарифланган. Улар тоғлардан келадиган сув оқимини тартибга солади ва кучли ёғингарчиликнинг вайронкор таъсирини камайтиради.

Ҳукумат 2035-йилгача инқирозга учраган камида 150 минг гектар сув ҳавзаси ва ўрмон майдонларини қайта тиклаш ёки барқарорлаштиришни режалаштирмоқда. Яна бир мақсад — асосий сув ҳавзаларининг камида 60 фоизини дарахтзорлаштириш, тоғ ёнбағрини мустаҳкамлаш ва бошқа табиатни муҳофаза қилиш тадбирлари билан қамраб олишдир.

Бундан ташқари, сел ва кўчки хавфи юқори бўлган ҳудудларда янги иншоотлар қуришда атрофдаги экотизимларнинг ҳолатини ҳисобга олиш тавсия этилмоқда. Бундай ҳудудлардаги янги обьект экотизим буферини баҳоламасдан лойиҳалаштирилмаслиги керак.

Шунингдек, 2035-йилгача заиф тоғ ва ўрмон экотизимларининг камида 80 фоизини мониторинг билан қамраб олиш кўзда тутилган. Муҳим ҳудудларда экотизимни тиклаш бўйича камида 40 та намойиш майдончасини ташкил этиш режалаштирилмоқда.