Қирғизистонда одам жасадини куйдириш тақиқланди

Қирғизистонда инсон жасадини куйдириш (кремация) амалиёти тақиқланди. Президент Садир Жапаров “Дафн этиш ва дафн ишлари тўғрисида”ги қонунга киритилган ўзгартиришларни имзолади.

Жогорку Кенеш томонидан 2026-йил 25-июнда қабул қилинган ушбу ҳужжатга кўра, Қирғизистондаги крематорийлар фақат тиббий фаолият натижасида ҳосил бўлган биологик обьектларни, яъни инсон аъзолари ва тўқималарини санитария мақсадида термик йўқ қилиш учун ишлатилиши мумкин.

Шу билан бирга, қонун вафот этган одамларнинг жасадларини, шунингдек, аборт қилинган ва ўлик туғилган ҳомилаларни бундай иншоотларда ёқишни тўғридан-тўғри тақиқлайди. Қонундан кремация, хокдонлар, колумбарийлар ва мотам деворлари билан боғлиқ қоидалар чиқариб ташланмоқда. Шахсига аниқлик киритилмаган жасадлар фақат қабристонлардаги ерга дафн этилади.

Тиббий биологик обьектларни йўқ қилиш иншоотлари давлат, маҳаллий бюджет ҳамда хусусий маблағлар ҳисобидан қурилиши мумкин. Қонун 10 кундан кейин кучга киради.

Эслатиб ўтамиз, 2024-йилда Қирғизистонда жасадни кремация қилишга рухсат берилиши ҳақида хабар берилганди. Ўшанда депутат Марлен Маматалиев шундай деганди: “Одамлар ўлганида уларни кремация қилиш керак, деган фикрда бўлганлар бор. Янги қонун крематорийлар қуришни назарда тутади. Уларда нафақат одамларнинг жасади, балки маълум касалликларга чалинган ўлик ҳайвонлар ҳам ёқилади”. У крематорийлар давлат ҳисобидан ва фақат шаҳарларда қурилишини таъкидлаган эди.