Қимматли қоғозлар эмитентлари учун 4 тоифали рейтинг жорий этилди
Эмитентлар ҳар чоракда етти мезон бўйича баҳоланади, натижалар очиқ эълон қилинади ва рейтинг тоифасига қараб
Қимматли қоғозлар эмитентлари учун 4 тоифали рейтинг жорий этилди
Адлия вазирлиги томонидан Қимматли қоғозлар эмитентларининг рейтингини юритиш тартиби тўғрисидаги идоравий ҳужжат давлат рўйхатидан ўтказилди. Ҳужжат 2026-йил 17-сентябрда 3941-сон билан рўйхатга олинган.
Мазкур ҳужжат 2025-йил 18-декабрдаги ПФ–254-сон Президент фармонига мувофиқ ишлаб чиқилган. Унда қимматли қоғозлар эмитентларининг фаолиятини баҳоловчи рейтингни юритиш ва рейтинг натижаларига кўра таъсир чораларини қўллаш тартиби белгиланган.
Эмитентлар рейтинги ҳар чорак якунлари бўйича Истиқболли лойиҳалар миллий агентлиги томонидан юритилади. Натижалар Корпоратив ахборот ягона портали — «openinfo.uz»да очиқ эълон қилинади.
Рейтинг ҳисобот чорагидан кейинги иккинчи ойнинг дастлабки 10 кунлигида эълон қилинади. Эмитентларга рейтинг натижалари ҳақида шахсий кабинети орқали хабар юборилади.
Эмитентнинг рейтинги етти мезон бўйича тўпланган баллар йиғиндиси асосида аниқланади. Якунда унга «А», «Б», «С» ёки «Д» тоифаларидан бири берилади.
Тоифага қараб эмитентларга нисбатан таъсир чоралари қўлланилиши мумкин. Бу чораларнинг амал қилиш муддати уч ой этиб белгиланган.
Янги тартиб эмитентлар фаолиятининг шаффофлигини ошириш ва қимматли қоғозлар бозорида аксиядорлар ҳуқуқларини ҳимоя қилишга қаратилган.
Ушбу низом расмий эълон қилинган кундан уч ой ўтиб кучга киради.