Қашқадарёда экинларни суғориш учун 550 млрд сўм ажратилади
Космик маълумотлар асосида аниқланган 30 минг гектар ерни ўзлаштириш учун сув таъминотини яхшилаш ва тежамкор
Қашқадарёда экинларни суғориш учун 550 млрд сўм йўналтирилади
Қашқадарё вилоятида экин майдонларига сув етказишни яхшилаш мақсадида келгуси йилда 265 километр канал бетонлаштирилади ва 20 та насос янгиланади. Ушбу ишлар учун 550 млрд сўм ажратилади.
Президент Шавкат Мирзиёев вилоятда экин майдонларига сув етказиш мураккаб ва қимматга тушаётганига эътибор қаратди. Шунингдек, 2027-йилда фермерлар билан биргаликда 75 минг гектар майдонда сув тежовчи технологиялар жорий этилиши белгиланди.
Космик маълумотлар асосида вилоятда фойдаланишга киритиш мумкин бўлган яна 30 минг гектар ер аниқланган. Унинг энг катта қисми Муборак, Косон ва Кўкдала туманларига тўғри келади.
Нишон, Қамаши, Қарши, Миришкор, Ғузор, Яккабоғ, Китоб, Чироқчи ва Шаҳрисабз туманларида ҳам қўшимча майдонлар ўзлаштирилади. Бу ишларга Мисрдан 10 нафар доимий маслаҳатчи жалб этилади.
Жорий йилда Косон, Нишон, Қамаши ва Миришкор туманларининг ҳар бирида сиғими 50 минг куб метр бўлган биттадан кичик сув ҳавзаси қурилди.
Тажрибани кенгайтириш доирасида 1 июнгача Косон, Нишон, Миришкор, Қамаши ва Яккабоғ туманларининг ҳар бирида яна иккитадан шундай сув ҳавзаси барпо этилади.