Қамчибек Ташиев ҳукм устидан шикоят қилди
Қирғизистон Миллий хавфсизлик давлат қўмитасининг собиқ раҳбари Қамчибек Ташиев суднинг унга нисбатан чиқарган ҳукми юзасидан шикоят аризаси киритди. Бу ҳақда унинг адвокати Икрамидин Айтқулов “Спутник” агентлигига маълум қилди.
“75 мактуб” иши бўйича чиқарилган ҳукм устидан шикоят Бишкек шаҳар судига тақдим этилган. Ҳимоя томони суднинг қароридан норози бўлиб, собиқ МХДҚ раҳбарини тўлиқ оқлашни талаб қилмоқда. Июл ойида “75 мактуб” иши бўйича ҳукм эълон қилинган эди. Қамчибек Ташиев ҳокимиятни куч билан эгаллашга тайёргарлик кўриш моддаси бўйича айбдор деб топилиб, мол-мулки мусодара қилинган ҳолда 4 йилга озодликдан маҳрум этиш жазосига ҳукм қилинган.
Шу билан бирга, суд Ташиевга нисбатан уч йиллик пробация назоратини қўллаган. Натижада, Миллий хавфсизлик қўмитасининг собиқ раиси озодликдан маҳрум этиш жазосини амалда ўтамайди.
**“75 мактуб” ҳақида**
Феврал ойида 75 нафар шахс президент Садир Жапаров ва Жогорку Кенеш раисига муддатидан олдин президентлик сайловларини ўтказишни сўраб мурожаат йўллаган эди. Ушбу мурожаат муаллифлари кейинчалик ҳибсга олиниб, айримларига нисбатан жиноий иш қўзғатилган. Мазкур мактуб ортидан Қамчибек Ташиев лавозимидан озод этилган. Ўшанда президент Садир Жапаров дўсти Ташиевнинг “75 мактуб”га алоқадорлигини тергов ва суд аниқлашини таъкидлаган эди.
29-июн куни бўлиб ўтган судда Қамчибек Ташиев прокурорларни айбловдан воз кечишга чақирган. Адвокатлар бу ташаббусни қўллаб-қувватлаган, бироқ прокуратура вакиллари таклифга ҳеч қандай муносабат билдирмаган. 2-июл куни эса суд ҳукм чиқарган. 16-июл куни Ташиев президентлик сайловларида номзодини қўймаслигини ва Қирғизистоннинг амалдаги президентини қўллаб-қувватлашини маълум қилган.