“Қамчи президент бўларди, мен эса дам олишга кетардим”: Жапаров Ташиев ҳақида гапирди

**Жапаров Ташиев ҳақида: "Қамчи президент бўларди, мен эса дам олишга кетардим"**

Қирғизистон президенти Садир Жапаров яқинда берган интервюсида Миллий хавфсизлик давлат қўмитаси (МХДҚ) собиқ раиси Қамчибек Ташиевни келажакда давлат раҳбари сифатида кўрганини маълум қилди. Бу ҳақда Kaktus.media хабар берди.

Жапаровнинг сўзларига кўра, у дастлаб иккинчи муддатга номзодини қўймасдан, Ташиевни қўллаб-қувватлашни режалаштирган. У МХДҚ собиқ раиси билан 20 йилдан ортиқ вақтдан бери оилавий дўст эканлигини таъкидлади.

"2020-йилда озодликка чиқиб, президент бўлганимда уни Миллий хавфсизлик давлат қўмитаси (МХДҚ) раиси этиб тайинладим. Ҳа, беш йил яхши ишлади. Лекин битта камчилиги — дўстларини, синфдошларини кузата олмади. У ишдан кетди. Албатта, инсон камчиликсиз бўлмайди. Инсон ишлаганда, камчиликлар бўлмаслиги мумкин эмас. У менинг дўстим бўлиб қолади, лекин уни бирор лавозимга тайинлаш ниятим йўқ", деди Қирғизистон президенти журналист Али Токтакуновга берган интервюсида.

Жапаровнинг айтишича, президентлик муддати тугагач, у дам олишга чиқишни режалаштирган. 2027-йилги сайловларда эса Қамчибек Ташиев иштирок этиши мумкин эди.

"2027-йилда олти йиллик президентлик муддатим тугагач, агар Қамчи тайёр бўлса, президентлик сайловига қайта чиқмайман, деб ўйлагандим. Қамчи президент бўларди, мен эса дам олишга кетардим. Шундай режам бор эди. Бир йил олдин бу ҳақда унга ўзим айтган эдим", деди Қирғизистон президенти.

У Ташиевга атрофдагиларга эътиборли бўлиб, сайловга тайёргарлик кўришини маслаҳат берганини таъкидлади. Бироқ кейинчалик, Садир Жапаровнинг сўзларига кўра, у ўз қарорини ўзгартирган.

"Кейин қарасам, у тайёр эмас. Ходимлари ўзини рисоладагидек тутмаяпти, атрофидаги одамлар эса ўзига бино қўйган. 75 оқсоқолнинг хати чиққанда, парламентни генерал тарафдорларига ажрата бошлашганда, мен уни чақириб: “Бундай бўлмайди. Одамларни иккига ажратиш мумкин эмас... Шунинг учун хафа бўлма, сени лавозимингдан озод қиламан, дедим", дея эслади Садир Жапаров.

У Қамчибек Ташиевнинг мамлакатга қўшган ҳиссасини инкор этмаслигини таъкидлади.

"У дам олиб, балки таҳлил қилиши, қаерда хато қилганини тушуниши керак. Мен фақат у хатолар қилди, дейишдан йироқман. Йўқ, натижалар бор, мамлакатимиз муваффақиятида унинг ҳиссаси жуда катта", деди Садир Жапаров.

Қирғизистон раҳбари 2027-йилги сайловларда ўз номзодини қўйишини маълум қилди.

"Мен яна бир муддатга ўз номзодимни қўйиш ва ишни давом эттириш ниятидаман. Яна ким сайловда қатнашмоқчи бўлса, ўз номзодини қўйсин. Ҳеч кимни чекламаймиз", деди у.

Қирғизистонда навбатдаги президентлик сайловлари 2027-йил 27-январда бўлиб ўтиши керак.

**"75 мактуб"**

Феврал ойида 75 киши президент Садир Жапаров ва Жогорку Кенеш раисига муддатидан олдин президентлик сайловларини ўтказишни сўраб мурожаат йўллаганди. Мурожаат муаллифлари кейинчалик қўлга олиниб, айримларига жиноий иш очилган. Мазкур мактуб ортидан Қамчибек Ташиев лавозимидан озод этилганди. Ўшанда президент Садир Жапаров дўсти Ташиевнинг "75 мактуб"га алоқадорлигини тергов ва суд аниқлашини айтган.

29-июн куни бўлиб ўтган судда Қамчибек Ташиев прокурорларни айбловдан воз кечишга чақирган. Адвокатлар бу ташаббусни қўллаб-қувватлаган, бироқ прокуратура вакиллари таклифга ҳеч қандай муносабат билдирмаган, 2-июл куни эса суд ҳукм чиқарган. Унга мол-мулки мусодара қилинган ҳолда 4 йилга озодликдан маҳрум этиш жазоси берилган.

Шу билан бирга, суд Ташиевга нисбатан уч йиллик пробация назоратини қўллаган. Шу тариқа, Миллий хавфсизлик қўмитаси собиқ раиси озодликдан маҳрум этиш жазосини амалда ўтамайди. 16-июл куни Ташиев президентлик сайловларида номзодини қўймаслиги, Қирғизистоннинг амалдаги президентини қўллаб-қувватлашини айтди.