Путинни «ноқонуний президент» деган блогер ҳибсга олинди
Россияда аввал ҳукуматга яқин қарашлари ва мухолифатга қарши фаолияти билан танилган блогер Иля Ремесло Россия президенти Владимир Путин ҳамда Украинадаги урушни кескин танқид қилганидан кейин армия ҳақида «ёлғон ахборот» тарқатиш иши бўйича Москвадаги тергов ҳибсхонасига жойлаштирилди. Унга 10 йилгача озодликдан маҳрум қилиш жазоси таҳдид қилмоқда.
Путинни «ноқонуний президент» деб атаган блогер ҳибсга олинди.
ТАСС агентлигининг 24-август куни блогернинг адвокати Сергей Бадамшинга таяниб хабар беришича, Иля Ремесло Россия армияси ҳақида «фейк» тарқатиш бўйича жиноят иши доирасида ўтказилган тиббий экспертизадан сўнг Москвадаги 7-сонли, «Капотня» номи билан ҳам танилган тергов ҳибсхонасига ўтказилган.
Бунгача Ремесло июл ойи охиридан бери Сербский номидаги психиатрия институтида суд-психологик ва психиатрик экспертизадан ўтаётган эди. Экспертиза натижалари ҳозирча очиқланмаган.
Блогер камида 16-сентабрга қадар тергов изоляторида қолиши кутилмоқда. Шу вақтда Москвадаги Басман суди унга нисбатан қўзғатилган жиноят ишини кўриб чиқишга тайёргарлик кўради. Айблов бўйича Ремеслога 10 йилгача қамоқ жазоси берилиши мумкин.
Иля Ремесло Россия Жамоат палатасининг собиқ аъзоси. Бироқ у жамоатчилик орасида асосан Россия мухолифати ва фаолларига қарши мурожаатлари билан танилган.
Хусусан, Ремесло Алексей Навалний ва Коррупсияга қарши кураш фонди (КҚКФ)нинг узоқ йиллик танқидчиларидан бири бўлган. У бу фаолияти билан Россия Жамоат палатасига тайинланишидан олдин ҳам танилган эди.
Навалнийнинг 2017-йилги президентлик кампанияси учун йиғилган хайрия маблағлари билан боғлиқ фирибгарлик иши айнан Ремеслонинг мурожаатидан кейин қўзғатилгани айтилмоқда. Кейинчалик унинг яна бир мурожаати Навалнийга нисбатан россиялик фахрийни ҳақорат қилиш бўйича жиноят иши очилишига асос бўлган.
2026-йил март ойида Ремесло кутилмаганда ўзининг Телеграм-каналида Владимир Путин ҳамда Россиянинг Украинага қарши уруши ҳақида кескин танқидий постлар эълон қилди.
У Путинни ҳокимиятни ўзлаштириб олишда айблаб, уни «ноқонуний президент», шунингдек, «ҳарбий жиноятчи ва ўғри» деб атаган.
Бу баёнотлар Ремеслонинг аввалги сиёсий позициясидан кескин фарқ қиларди. Чунки у узоқ йиллар давомида Путин ҳокимиятини қўллаб-қувватлаб келган ва Россия мухолифатига қарши фаол ҳаракат қилган.
Путинни танқид қилган постлар эълон қилинганидан икки кун ўтиб Ремесло психиатрия шифохонасига ётқизилган. Айрим маълумотларга кўра, унинг шифохонага тушишига блогернинг синглиси ҳам аралашган.