Путин Украинани Россиядаги парламент сайловларига аралашишда айблади
Путин Украинани Россиядаги парламент сайловларига аралашишда айблади
Россия президенти Владимир Путин Украина урушни якунлашга қаратилган музокараларга атайлаб тўсқинлик қилаётганини билдирди. У, шунингдек, Киевни Россиядаги парламент сайловларига аралашаётганликда айблади.
Путин бу фикрларни Россия Ҳарбий-саноат комиссияси йиғилишида айтиб, ҳеч қандай далил тақдим этмади.
“Украина раҳбарияти сайлов ўтказишга шошилмаяпти. Лекин улар бизга халақит беришга уринмоқда”, деди Путин.
Унинг сўзларига кўра, Украинада ҳокимият аллақачон диктатурага айланган. Путин буни Украина раҳбари Владимир Зеленскийнинг ваколат муддати тугаган бўлса-да, янги президентлик сайлови ўтказилмагани билан изоҳлади.
Бироқ Украинада 2022-йилда бошланган Россия босқинидан бери ҳарбий ҳолат жорий этилган. Зеленский ва бошқа расмийлар ҳарбий ҳолат даврида сайлов ўтказиш мумкин эмаслигини айтади. Киев Россиядаги сайловларни натижаси олдиндан маълум бўлган “сохта сайлов” деб атади.
Россияда уч кунлик парламент сайловлари 18-сентябр куни бошланди. Урушга қарши номзодларнинг аксариятига сайловда қатнашишга рухсат берилмади. Реутерс хабарига кўра, Кремл сайлов натижаларини халқнинг Путин сиёсатини қўллаб-қувватлаётганининг далили сифатида кўрсатмоқчи.
Путиннинг айтишича, Украинанинг Россия обьектларига уюштираётган зарбалари Киев тинчлик музокараларига тайёр эмаслигини кўрсатади. У бунга мисол сифатида Запорожьенинг босиб олинган қисмидаги ҳодисани келтирди. У ерда Украина зарбаси оқибатида маҳаллий сайлов комиссияси раҳбари ҳалок бўлган.
“Шундай жиноятларни содир этиш орқали улар тинчлик ва музокаралар бўлмаслиги учун ҳамма нарса қилмоқда”, деди Путин.
Йиғилишда Путин Россия мудофаасида ҳануз “ядро триадаси”га — қуруқлик, денгиз ва авиация қуролларига — таянилаётганини айтди. У, шунингдек, ҳаво мудофааси тизимларини ҳам яхшилаш зарурлигини таъкидлади.
Украина дрон имкониятларини тез суръатларда ривожлантирмоқда. Мамлакат Россия чегарасидан 3000 километр узоқликдаги саноат обьектларига зарба бермоқда. Бу Россияда ёнилғи таъминоти ва кундалик ҳаётга халақит бермоқда.
“Ҳа, бундай имкониятни истисно қилмаймиз. Биз айнан яқин истиқбол ҳақида гапиряпмиз. Яъни, тахминан, октябр. Октябрни истисно қилиб бўлмайди”, деган эди Россия президенти матбуот котиби Дмитрий Песков.