Путин Таркеттънинг Россиядаги активларини бошқа компания бошқарувига берди
Россия президенти Владимир Путин Франсиянинг пол қопламалари ишлаб чиқарувчи Таркетт компаниясининг Россиядаги активларини ташқи бошқарувга ўтказди. 15-октабрда эълон қилинган фармонга кўра, аксиялар «Сентр Капитал» компанияси бошқарувига берилган.
Путин Таркеттънинг Россиядаги активларини бошқа компания бошқарувига топширди
ДВ нашри фармонга таянган ҳолда хабар беришича, бу қарор Сербиянинг Бачка-Паланка шаҳрида рўйхатдан ўтган Таркетт компаниясига тегишли «Таркетт» аксиядорлик жамияти аксияларини ҳам қамраб олади.
Фармон орқали бошқа хорижий компанияларнинг Россиядаги активларига ҳам вақтинча бошқарув жорий этилди. Улар орасида «Каппа Рус»нинг 12 565 та аксияси, шунингдек, «Онтекс РУ», «Эвиосис Пекеджинг Кубан» ва «Менсен Пакажинг СНГ» компанияларининг 100 фоизлик улушлари бор.
Таркетт тураржой, савдо, саноат ва спорт обьектлари учун пол қопламалари ишлаб чиқаради. ДВ маълумотига кўра, компаниянинг 34 та заводи бор, улардан иккитаси Россияда жойлашган. Шунингдек, компания эскирган пол қопламаларини қайта ишлайдиган саккизта корхонага ҳам эга.
Сентабр ойида Нестле, Метро, Аучан ва Лерой Мерлинънинг собиқ Россия бизнеси бўлган «Лемана Про» активлари ҳам вақтинча бошқарувга ўтказилган эди.
Реутерс агентлиги Россия ҳукуматидаги манбаларига таяниб, 2022-йилда Украинага кенг кўламли ҳужум бошланганидан кейин ҳам Россияда фаолиятини давом эттирган йирик Ғарб компаниялари активларига қаратилган чораларни санксияларга жавоб кампанияси деб таърифлаган.
Агентлик суҳбатдошлари УниСредит ва Раиффеисен банкларининг Россиядаги бўлинмаларига ҳам вақтинча ташқи бошқарув жорий этилиши мумкинлигини истисно қилмаган. Бироқ бу борада қарор қабул қилингани ҳақида хабар берилмаган.