Путин тан олди: Украина зарбалари Россияга ЯИМнинг 1 фоизига тушди
Россия президенти Владимир Путин Украинанинг нефтни қайта ишлаш заводларига зарбалари мамлакат ялпи ички маҳсулотининг қарийб 1 фоизига тенг йўқотишга олиб келганини билдирди. У ҳужумлар қисман мақсадига етганини тан олди, бироқ энергетика обьектлари ва кемаларга ўзаро зарба беришни тўхтатиш таклифини рад этди.
Путин тан олди: Украина ҳужумлари Россияга ЯИМнинг 1 фоизига тенг зарар етказди
ДВ хабарига кўра, Путин бу ҳақда 1-октабр куни «Валдай» халқаро мунозара клубининг ялпи мажлисида маълум қилган.
Унинг айтишича, Украина Россиядаги нефтни қайта ишлаш заводларига зарба бериш орқали мамлакат иқтисодиётига зарар етказишни мақсад қилган.
«Мақсадга эришдими? Қисман», - деган Россия президенти.
Путин бундай зарбалар оқибатидаги йўқотишларни Россия ЯИМнинг тахминан 1 фоизи деб баҳолаган.
У Москва бунга жавобан Украина иқтисодиёти учун муҳим деб ҳисоблаган обьектларга зарба бераётганини айтган. Путин, жумладан, Украина металлургия тармоғи амалда тўхтаб қолганини даъво қилган. Унинг иддаосича, бу тармоқ қурол ишлаб чиқаришда ҳам ишлатилади.
### Йирик заводларда ишлаб чиқариш камайган
Сўнгги ойларда Россия нефтни қайта ишлаш заводларига уюштирилган зарбалар ёнилғи ишлаб чиқаришда узилишларга сабаб бўлган.
Реутерс маълумотига кўра, Россиядаги олтита йирик дизел ишлаб чиқарувчи корхона мамлакатдаги ушбу ёнилғи ишлаб чиқаришининг қарийб ярмини таъминлаган. Бироқ сентабр ойида уларнинг бир нечтаси ишлаб чиқаришни кескин қисқартирган ёки бутунлай тўхтатган.
Хусусан, Кириши нефтни қайта ишлаш заводи фаолиятини тўлиқ тўхтатган. Волгоград заводи ва НОРСИ корхонаси эса белгиланган қувватининг тахминан тўртдан бир қисмида ишлаган.
Халқаро энергетика агентлиги маълумотига кўра, 2026-йилнинг дастлабки саккиз ойида Россиядаги нефтни қайта ишлаш заводларига ўртача ҳар уч кунда бир марта муваффақиятли зарба берилгани қайд этилган.
### Дизел экспортига тақиқ узайтирилган
Корхоналардаги узилишлар Россиядан ёнилғи экспортига чекловлар жорий этилишининг сабабларидан бири бўлган.
Реутерс 30-сентабр куни Россия ҳукумати дизел экспортига қўйилган тақиқни октабр охиригача узайтирганини хабар қилган.
Бунгача ҳам ёнилғи тақчиллиги ва ички бозорда нархлар ошиши фонида экспорт чекловлари бир неча бор жорий этилган эди.