Профилактика инспекторларига қўшимча ваколатлар берилади
Инспекторнинг хизмат вазифаларини бажаришига тўсқинлик қилганлик учун маъмурий жавобгарлик белгиланади.
Профилактика инспекторларига қўшимча ваколатлар берилади
Ички ишлар органларининг жамоат хавфсизлигини таъминлаш фаолиятига янгича ишлаш тизими жорий этилади.
Қарорга мувофиқ, ички ишлар органлари жамоат хавфсизлигини таъминлаш бўлинмаларининг фаолияти қуйидаги устувор ишлаш механизмлари асосида яхлит тизим сифатида йўлга қўйилади:
- хизмат йўналиши ва хизмат ўташ ҳудудидан қатъи назар фуқароларнинг мурожаатлари ва хабарларига тезкор жавоб бериш;
- аҳоли билан бевосита, яқин ва очиқ мулоқот ўрнатиш ҳамда уларнинг ҳуқуқбузарликка сабаб бўлиши мумкин бўлган муаммоларини ҳал этишга кўмаклашиш;
- бевосита жойларда ҳуқуқбузарликларнинг содир этилиш сабаблари ва омилларини эрта аниқлаш ҳамда бартараф этиш, хавф гуруҳига кирувчи шахслар билан кунлик асосда манзилли профилактик ишларни йўлга қўйиш.
Профилактика инспекторининг хизмат вазифаларини бажаришига тўсқинлик қилганлик учун маъмурий жавобгарлик белгиланади.
Профилактика инспекторларига қуйидаги қўшимча ваколатлар берилади:
- кўриб чиқиш ваколати доирасидаги биринчи маротаба содир этилаётган 17 турдаги кам аҳамиятли маъмурий ҳуқуқбузарликлар бўйича маъмурий огоҳлантириш жазосини қўллаш;
- йўл ҳаракати хавфсизлигини таъминлаш борасида маҳалла кўчалари ва йўлакларида йўл ҳаракати қоидалари бузилиши билан боғлиқ 4 турдаги маъмурий ҳуқуқбузарликлар бўйича маъмурий жазо қўллаш;
- туман (шаҳар) ички ишлар органи бошлиғи ёки унинг ўринбосарларининг ваколатидаги 9 турдаги маъмурий ҳуқуқбузарликлар тўғрисидаги ишларни кўриб чиқиш ва маъмурий жазо қўллаш.