Президент иштирокида умумий қиймати 50 трлн сўмлик лойиҳалар ишга туширилди
Янги лойиҳалар ҳисобига 15 мингта иш ўрни яратилади, буджетга йилига қўшимча 1 триллион сўм тушум
Президент Шавкат Мирзиёев иштирокида умумий қиймати 50 триллион сўмга тенг лойиҳалар ишга туширилди. Бу маросим мамлакат мустақиллигининг 35 йиллиги муносабати билан ҳудудларда янги обьектларни очишга бағишланди.
Тадбирда давлат раҳбари ҳудудлардаги студияларга йиғилган кенг жамоатчилик вакилларини ва улар орқали бутун халқни яқинлашиб келаётган улуғ байрам билан табриклади.
Сўнгги ўн йилда Ўзбекистонда инсон қадрини улуғлаш ва аҳоли фаровонлигини оширишга қаратилган кенг кўламли ислоҳотлар амалга оширилди. Тадбиркорликка кенг йўл очилиб, иқтисодиётни диверсификация қилиш, рақобатбардош саноат тармоқларини яратиш, чекка туман ва қишлоқлар инфратузилмасини яхшилаш бўйича улкан ишлар бажарилди. Таълим, тиббиёт ва маданият соҳаларига эътибор янги босқичга кўтарилди.
Президентимиз таъкидлашича, "Сўнгги ўн йил мамлакатимиз тарихида янги Уйғониш даври – Учинчи Ренессанс пойдеворини қуриш босқичи сифатида абадий муҳрланди".
Бу даврда иқтисодиёт ҳажми 2,5 баробардан зиёд ошди. Иқтисодиёт тармоқларига 160 миллиард доллар хорижий инвестиция жалб қилиниб, умумий қиймати 76 миллиард долларлик 2 минг 163 та йирик саноат лойиҳаси ишга туширилди, қарийб 6 миллион нафар аҳоли доимий иш ўрни билан таъминланди.
Бугунги кунда мамлакатимизда дунёнинг етакчи компаниялари, йирик инвесторлари ва халқаро молия институтлари иштирокида кўплаб лойиҳалар амалга оширилмоқда. Инвестициялар кўпайиши билан саноатимиз қиёфаси ҳам тубдан ўзгармоқда.
Давлат раҳбари шундай деди: "Биз хомашё экспорт қилган давлатдан уни чуқур қайта ишлаш занжири асосида тайёр маҳсулотни жаҳон бозорига олиб чиқадиган иқтисодиётга ўтяпмиз. Энг муҳими, янги корхоналар билан бирга замонавий технологиялар, янги касблар ва юқори малакали иш ўринлари ҳам пайдо бўлмоқда".
Жорий йилнинг ўзида 1,7 миллиард долларлик 56 та йирик замонавий саноат ва сервис обьекти иш бошлади, 8,8 мингта юқори даромадли иш ўрни яратилди.
Шунингдек, буджетдан ажратилган 46 триллион сўм ҳисобидан 385 та мактаб, 113 та боғча, 81 та шифохона, 7,5 минг километр йўл, 3,2 минг километр ичимлик суви ва канализация тармоқлари қурилди, таъмирланди ва реконструксия қилинди.
Бугунги маросимда мамлакатимизнинг барча ҳудудларида умумий қиймати қарийб 50 триллион сўм бўлган 72 та йирик саноат ва сервис лойиҳаси ҳамда 91 та ижтимоий соҳа обьекти фойдаланишга топширилди. Уларнинг очилиши Мустақиллик байрамига муносиб туҳфа бўлди.
Янги лойиҳалар ҳисобига 15 мингта иш ўрни яратилади, буджетга йилига қўшимча 1 триллион сўм тушум тушиши таъминланади.
Инвестиция лойиҳалари энергетика, қишлоқ хўжалиги ва озиқ-овқат саноати, металлургия, автомобилсозлик, электротехника, қурилиш материаллари, тоғ-кон, тўқимачилик ва енгил саноат каби муҳим йўналишларни қамраб олган.
Жумладан, Сирдарё вилоятида 1 минг 573 мегаваттли электр энергияси ишлаб чиқариш қуввати, Қорақалпоғистон Республикасида 200 мегаваттли шамол электр стансияси ва 100 мегаваттли энергия сақлаш тизими ишга туширилди. Навоий вилоятидаги янги энергетика лойиҳалари йилига 657 миллион киловатт-соат электр энергиясини ишлаб чиқаради.
Мазкур лойиҳалар орасида мамлакатимизнинг экспорт салоҳиятини сезиларли оширадиган қувватлар ҳам бор. Андижон, Наманган ва Жиззах вилоятларида ишга туширилган тўқимачилик, трикотаж ва гилам маҳсулотлари ишлаб чиқариш корхоналари миллионлаб долларлик экспортни таъминлайди. Самарқанд ва Тошкент вилоятларида барпо этилган янги металлургия корхоналари ҳам саноат кооперациясини кенгайтириш ва импорт ўрнини босишга хизмат қилади.
Президентимиз бугунги лойиҳаларни фақат инвестиция ва экспорт кўрсаткичлари билан ўлчаш тўғри бўлмаслигини таъкидлади. Янги ўқув йили арафасида ижтимоий соҳада ҳам кўплаб замонавий обьектлар фойдаланишга топширилмоқда. Улар орасида 36 та болалар боғчаси, 43 та мактаб, 7 та олий таълим муассасаси ва 3 та шифохона бор.
Янги Тошкент ҳудудида жаҳон стандартлари асосида 10 гектар майдонда барпо этилган Янги Ўзбекистон университетининг замонавий мажмуаси шулар жумласидандир. Бу ерда 7 минг нафар талаба таҳсил олиши учун шароит яратилган.
Олий таълим муассасасида Гарвард университети билан ҳамкорликда Ректорлар мактаби фаолияти йўлга қўйилди. Оксфорд университети билан биргаликда давлат хизматчиларининг малакасини ошириш бўйича “Таълим хаби” ташкил этилади. 1-октябрдан Сунъий интеллект институти иш бошлайди.
Шунингдек, 30 минг квадрат метр майдонга эга беш қаватли янги Миллий кутубхона энг замонавий техникалар билан жиҳозланган. У бир вақтнинг ўзида 1,5 минг нафар китобхонга хизмат кўрсата олади. Бу ерда 28 дан зиёд ўқув хонаси ва заллар, турли сиғимдаги конференсия заллари ташкил этилган, 200 мингдан ортиқ китоб жамланган.
Қарши шаҳрида 400 миллиард сўмлик Иқтисодиёт ва педагогика университетининг замонавий бино ва иншоотлари барпо этилди. Бу ерда 3 минг нафар талаба таҳсил олади, 700 нафар аҳоли даромадли иш билан таъминланади.
Фарғона вилоятидаги янги замонавий тиббиёт муассасасида эса йилига 60 минг нафар беморни даволаш ва 30 минг нафар аёлни скринингдан ўтказиш имконияти яратилди.
Давлатимиз раҳбари янги обьектларни барпо этишда иштирок этган инвестор ва тадбиркорлар меҳнатини юксак баҳолади.
Президентимиз шундай деди: "Сиз киритаётган ҳар бир инвестиция Ўзбекистон келажагининг пойдеворини мустаҳкамлайди. Сиз яратаётган ҳар бир иш ўрни оилалар фаровонлигига хизмат қилади. Сиз ишлаб чиқараётган ҳар бир маҳсулот мамлакатимиз иқтисодий салоҳиятини янги босқичга олиб чиқади. Сиз экспорт қилаётган ҳар бир товар Ўзбекистоннинг жаҳон бозоридаги рақобатбардошлигини оширади".
Ушбу лойиҳаларни барпо этишда фидойилик кўрсатган қурувчилар, муҳандис ва лойиҳачилар, тадбиркор ва инвесторларга миннатдорлик билдирилди.
Шундан сўнг давлатимиз раҳбари рамзий тугмани босди ва 72 та йирик инвестиция лойиҳаси ҳамда 91 та ижтимоий соҳа обьекти фойдаланишга топширилди.