Президент администрацияси департаменти раҳбари Дониёр Қодировга генерал-маёр унвони берилди
Президент администрацияси департаменти раҳбари Дониёр Қодировга генерал-маёр унвони топширилди.
Мустақилликнинг 35 йиллиги муносабати билан ўтказилган тантанали маросимда Шавкат Мирзиёев бир гуруҳ ватандошларга юксак давлат мукофотларини топширди. Тадбир давомида давлат раҳбари Президент администрацияси Жамоат хавфсизлиги ва қонун устуворлиги бўйича департаменти раҳбари Дониёр Қодировга генерал-маёр ҳарбий унвонини берди.
Дониёр Бахтиёрович Қодиров 2025-йил июл ойида Президент администрациясидаги ўзгаришлар натижасида президентнинг ҳуқуқни муҳофаза қилувчи ва назорат органлари фаолиятини мувофиқлаштириш масалалари бўйича маслаҳатчиси лавозимидан озод этилган эди. Ўша пайтда у Президент администрацияси Жамоат хавфсизлиги ва қонун устуворлиги бўйича департаменти раҳбари этиб тайинланган.
Дониёр Қодиров илгари ИИВ Транспортда хавфсизликни таъминлаш бош бошқармасига раҳбарлик қилган, шунингдек, 2018-2019 йилларда ИИВ Терроризм ва экстремизмга қарши курашиш бош бошқармаси бошлиғи лавозимида ишлаган. 2021-йил январ ойида у президентнинг ҳуқуқни муҳофаза қилувчи ва назорат органлари фаолиятини мувофиқлаштириш масалалари бўйича маслаҳатчиси ўринбосари лавозимига тайинланган, 2023-йил августида эса шу соҳа бўйича маслаҳатчига айланган эди.