Пресли Гербер, Синди Кроуфорднинг ўғли, 27 ёшида вафот этди
Унинг оиласи моделнинг вафотидан кейинги «жуда оғир ва азобли даврда» шахсий ҳаётга дахл қилмасликни сўради.
Пресли Гербер, Синди Кроуфорднинг ўғли, 27 ёшида вафот этди
Супермодель Синди Кроуфорднинг ўғли Пресли Гербер 27 ёшида вафот этди.
Лос-Анжелес округи тиббий экспертиза бошқармаси ҳужжатларига кўра, модель бўлиб ишлаган Гербер якшанба куни реабилитация марказида вафот этган. Ўлим сабаби кўрсатилмаган.
Кроуфорд ва унинг турмуш ўртоғи Рэнди Гербернинг вакили Элли Женкинс BBC’нинг АҚШдаги ҳамкори CBS телеканалига шундай деди: «Оила ушбу жуда оғир ва қайғули дамларда уларнинг шахсий ҳаётига дахл қилмасликни сўрайди».
Гербер онаси ва синглиси Кайянинг изидан бориб, модель сифатида фаолият юритган ва илк бор 16 ёшида Италиянинг Moschino бренди намойишида подиумга чиққан эди.
Кейинчалик у Бурберрй, Долсе & Gabbana ва Bottega Veneta каби брендлар учун модель сифатида суратга тушган.
Унинг отаси, таниқли тадбиркор Рэнди Гербер Жорж Клуни билан биргаликда Casamigos текила брендига асос солган.
Сўнгги йилларда Гербер ўзининг руҳий саломатлигидаги муаммолар ва гиёҳванд моддалар истеъмоли ҳақида очиқ гапириб келаётган эди.
2023 йилда у Studio 22 подкастига берган интервьюсида шундай деганди: «Руҳий саломатлик, депрессия ва шу билан боғлиқ бошқа муаммолар билан курашган инсон сифатида шуни айта оламанки, ҳаётимнинг маълум бир даврида ўзим тушиб қолган ўша чоҳдан лоақал бир кишига ёки юзлаб одамларга чиқишга ёрдам бера олсам, мен учун шунинг ўзи кифоя».
Шунингдек, шу ойдаги Американинг Vogue журналида Кайя акасининг қарамлик билан кураши ҳақида гапирган эди. У шундай деди: «Оилада шундай воқеа юз берганда, бу ҳаммага таъсир қилади.
Менимча, шу сабабли ҳам мен ўзимни муаммосиз фарзанд сифатида кўрсатишга ҳаракат қила бошладим ва ҳеч қачон ёрдам сўрашни истамадим».