Португалиялик 25 ёшли футболчи ўртоқлик ўйини вақтида вафот этди

Португалиялик 25 ёшли футболчи Кевин де Каштру ўртоқлик ўйини чоғида ҳаётдан кўз юмди. Бу ҳақда А Бола нашри маълум қилди.

Воқеа "Реал Массама" ва "Эштрала" жамоалари ўртасидаги ўртоқлик учрашувида содир бўлган. "Реал Массама" жамоасига яқинда қўшилган де Каштру ўйиннинг 10-дақиқасида ҳушини йўқотган.

Иккала жамоанинг шифокорлари дарҳол биринчи ёрдам кўрсатишган ва дефибриллятордан фойдаланишган. Аммо футболчининг ҳаётини сақлаб қолишнинг иложи бўлмаган. У шифохонага олиб кетилган, бироқ шифокорлар унинг вафот этганини тасдиқлашган.

Де Каштру 16-август куни 25 ёшга тўлган эди.

"Эштрала" клуби футболчининг оила аъзолари ва яқинларига, шунингдек, "Реал Массама" раҳбарияти ва клубнинг барча вакилларига чуқур ҳамдардлик билдирди.

Де Каштру Португалияда туғилган, аммо болалигида Англияга кўчиб ўтган. У ерда "Вест Бромвич", "Бёртон Албион", "Нотц Каунти" ва "Ёрк Сити" клубларида ўйнаган.