Португалиядаги нуфузли турнирда 19 ёшли велоспортчи ҳалок бўлди

Португалиядаги нуфузли турнирда 19 ёшли велоспортчи вафот этди.

Британиялик велосипедчи Финли Тарлинг "Волта Португалия" кўп кунлик велопойгасининг саккизинчи босқичида йўл-транспорт ҳодисаси натижасида олган жароҳатлари туфайли ҳаётдан кўз юмди.

19 ёшли спортчи пелотон ҳаракатланаётган йўналишга қарама-қарши томондан келаётган автомобил билан тўқнашиб кетган. У воқеа жойида вафот этган.

Ташкилотчилар кўп кунлик велопойгани вақтинча тўхтатишга қарор қилди. Турнирнинг кейинги тақдири ҳозирча номаълум.

Маълумот учун, "Волта Португалия" 1927-йилдан буён ҳар йили Португалияда ўтказиладиган кўп босқичли шоссе велопойга мусобақасидир. Велоспорт оламида учта нуфузли Гранд турдан ("Жиро де Италия", "Тур де Франс" ҳамда "Вуелта Испания") кейинги энг узоқ давом этадиган босқичлардан бири ҳисобланади. Шунингдек, у дунёдаги энг қадимги кўп босқичли велопойгалар қаторига киради. Турнир икки ҳафта давом этади.

"Волта Португалия" учта Гранд тур каби нуфузли бўлмаса-да, узоқ йиллар давомида муҳим мусобақалардан бири бўлиб келган. Бироқ сўнгги йилларда унинг аҳамияти пасайиб бормоқда. Бунга, айниқса, мусобақанинг "Тур де Франс" ҳамда "Вуелта Испания" турнирлари оралиғида ўтказилиши сабаб бўлмоқда. Бундай тақвим йирик жамоалар ва кучли велоспортчиларнинг мусобақада иштирок этиш имкониятини чеклайди.