Португалияда юзни бутунлай ёпиб юриш тақиқланди

Португалияда жамоат жойларида юзни тўлиқ ёпиб юришни тақиқловчи қонун кучга кирди. Президент томонидан тасдиқланган ушбу қонун ўнг қанот партиялари томонидан илгари сурилган бўлиб, асосан мусулмон аёлларнинг юзни тўлиқ беркитувчи кийимларини чеклашни назарда тутади.

Қонун матнида таъкидланишича, "юз инсон шахсияти ва мулоқотининг марказий элементи сифатида қаралиши керак". Маҳаллий ОАВ томонидан "бурқа қонуни" деб номланган бу ҳужжат июл ойида парламент томонидан қабул қилинган эди. Унга ҳукмрон ўнг коалиция ва ўнг қанот вакиллари овоз берган бўлса, сўл партиялар қарши чиққан.

Янги қонун жамоат жойларида юзни беркитадиган ёки шахсни аниқлашга тўсқинлик қиладиган кийимларни кийишни ман этади. Шунингдек, жинси, дини, ёши ёки келиб чиқиши сабабли шахсни юзини беркитишга мажбурлаш ҳам тақиқланади.

Ҳуқуқ ҳимоячилари бундай тақиқларни аёлларнинг кийиниш эркинлигини чекловчи ва уларнинг ҳуқуқларини бузувчи ҳаракат деб баҳоламоқда. Президент Сегуру бу масаланинг ижтимоий ва маданий жиҳатдан жуда нозик эканлигини тан олган.

Қонунни бузган шахсларга 150 евродан 3000 еврогача (тахминан 170 доллардан 3500 долларгача) жарима солиниши белгиланган. Бироқ, соғлиқни сақлаш, касбий фаолият, ижодий сабаблар ёки об-ҳаво шароитлари билан боғлиқ ҳолатлар учун истиснолар мавжуд. Шунингдек, ибодатхоналар, дипломатик ваколатхоналар ва самолётлар ичида юзни беркитишга рухсат берилади.

Эслатиб ўтамиз, аввалроқ Австрия мактабларида 14 ёшгача бўлган қизларга рўмол ўраш тақиқлангани ҳақида хабар берилган эди.