Порсче яна 5 минг ходимни қисқартиришини эълон қилди
Германиянинг Порсче АГ компанияси 2035 йилгача жами 9 400 нафардан ортиқ ходимни қисқартиришни режалаштирмоқда. Компания бу қарорни Хитойдаги сотувлар пасайиши, АҚШ божларининг ошиши ва электромобилларга киритилган сармоялар кутилган натижани бермаётгани билан изоҳлади.
Порсче яна 5 минг иш ўрнини қисқартиришини эълон қилди.
27-июл куни Порсче АГ кузатув кенгаши ходимлар йиғилишидан сўнг компанияда қўшимча 5 мингта иш ўрни қисқартирилишини маълум қилди.
Аввалроқ, 2025-йилда қабул қилинган "Келажак пакти" доирасида Порсче компаниясининг 3 900 нафар, унинг шўба корхоналарида эса яна 500 нафар ходимни қисқартириш режаси эълон қилинган эди. Шу тариқа, 2035-йилга қадар қисқартириладиган иш ўринлари сони 9 400 тадан ортиқни ташкил этади.
Янги чоралар Порсчеънинг Штутгарт-Цуффенхаузендаги асосий заводи ҳамда Вайсах шаҳрида жойлашган илмий-тадқиқот марказига тааллуқли бўлади. Шу билан бирга, компания ишлаб чиқариш майдонларини сақлаб қолиш ва 2035-йилгача ишлаб чиқаришни ривожлантириш учун 2,1 миллиард евро инвестиция киритишини маълум қилди.
Компания маълум қилишича, қисқартиришлар "ижтимоий масъулиятли тарзда" амалга оширилади. Бу жараён асосан табиий кадрлар алмашинуви, ходимларнинг пенсияга чиқиши ҳамда ихтиёрий ишдан бўшаш тўғрисидаги келишувлар орқали ташкил этилади. Порсче раҳбариятининг таъкидлашича, мақсад компаниянинг рақобатбардошлигини ошириш ва имкони борича кўпроқ иш ўринларини узоқ муддатда сақлаб қолишдан иборат. Бироқ Реутерс агентлиги ҳисоб-китобларига кўра, қисқартиришлар деярли ҳар бешинчи иш ўрнига таъсир қилади.
Компания харажатларни қисқартириш мақсадида меҳнат шартларига ҳам ўзгартиш киритмоқда. Жамоавий шартнома бўйича режалаштирилган маош оширишларининг 3,5 фоизи ушлаб қолинади. Шунингдек, Рождество мукофоти бир ойлик маошнинг 100 фоизидан 60 фоизигача қисқартирилади. ИГ Металл касаба уюшмаси аъзоларига эса йилига 200 евро миқдорида қўшимча бонус ва трансформация дастури бўйича бир марталик 1 500 евролик тўловга қўшимча 411 евро устама берилиши режалаштирилган.
Масофадан ишлаш имконияти ҳам чекланади - ходимлар ойига 12 кун ўрнига 8 кун уйдан ишлай олади. Шунингдек, ходимлар ва раҳбариятнинг катта қисми учун маошларни ошириш суръати ҳам пасайтирилади.
Порсче сўнгги йилларда давом этаётган молиявий босимга дуч келмоқда. Компаниянинг 2025-йилдаги соф фойдаси 91 фоизга камайиб, 310 миллион еврога тушган. Бу салбий тенденсия 2026-йилнинг биринчи чорагида ҳам давом этган, гарчи пасайиш суръати секинлашган бўлса-да. Компания инқирознинг асосий сабаблари сифатида Хитой бозорида сотувлар қисқаргани, АҚШнинг импорт божлари ошгани ҳамда электромобиллар ишлаб чиқаришига киритилган катта сармоялар ҳозирча кутилган иқтисодий самарани бермаётганини кўрсатмоқда.