Полша Венесуела нефтини криптовалюта билан сотиб олишга уриниб, 230 млн доллар йўқотди
Полша Венесуела нефтини криптовалюта орқали сотиб олишга уринишда 230 млн доллар йўқотди
Полшанинг энг йирик нефт компанияси Орлен Венесуела хомашёсини Дубайдаги трейдер орқали харид қилишга уриниб, катта молиявий зарар кўрди. Мамлакат 230 миллион доллар олдиндан тўлов қилган ва маблағнинг бир қисмини криптовалютага айлантирган. Аммо ваъда қилинган нефт деярли етказиб берилмаган.
Битим 2023-йил ноябрида Орленънинг Швейсариядаги шўба корхонаси — ОЦ ва Дубайда жойлашган Ҳаннон Интернатионал компанияси ўртасида тузилган эди. ОЦ 345 миллион долларга 6 миллион баррел Венесуела нефтини сотиб олишга келишган.
Шартнома шартига кўра, сумманинг учдан икки қисми олдиндан тўланиши керак эди. ОЦ шартнома имзолангач, беш кун ичида Ҳаннон ҳисобига 230 миллион доллар ўтказган. Бу келишув АҚШ Венесуела нефтига нисбатан санксияларни вақтинча юмшатган даврда амалга оширилган.
Венесуеланинг ПДВСА давлат нефт компанияси банк санксиялари туфайли тўловларни УСДТ криптовалютасида талаб қилган. Шу сабаб Ҳаннон Полшадан олган пулларни криптовалютага айлантиришга мажбур бўлган. Криптовалюта операциялари ва турли компаниялар орқали ўтказиш жараёнида миллионлаб доллар йўқолган.
2024-йил январида Ҳаннон раҳбари Каракасга бориб, воситачиларга умумий қиймати 132 миллион долларга тенг УСДТ криптовалютаси солинган флешкаларни топширган. Бироқ воситачилар тез орада алоқага чиқмай қўйган ва нефт барибир берилмаган.
Шу орада Полша ёллаган учта йирик супертанкер Венесуела қирғоқларида нефт юкланишини беҳуда кутиб турган. Нефт етказиб берилмагани сабабли кемаларнинг соҳилда бекор туриши учун тўланадиган жарима ва харажатлар 72 миллион доллардан ошиб кетган. Кейинчалик фақат битта кема мўлжалланган ҳажмдаги нефтнинг ярмини, тахминан 500 минг баррелни олишга муваффақ бўлган.
2024-йил мартида Полшадаги ҳокимият ва компания раҳбарияти алмашгач, Орленънинг янги раҳбарияти ушбу шартномани бекор қилган. Полша ҳукумати ҳисоб-китобига кўра, компаниянинг барча ҳуқуқий ва транспорт харажатлари билан бирга кўрган умумий зарари 1,6 миллиард злотий ёки 424 миллион доллардан ошган.
Ҳозир Полша прокуратураси ОЦ компаниясининг собиқ раҳбарларига нисбатан хизмат ваколатини суиистеъмол қилиш ва ноқонуний бошқарув бўйича жиноят иши қўзғатган. Мамлакат бош вазири Доналд Туск бу можаро юзасидан кенг кўламли текширув бошланганини ва барча тафсилотлар жамоатчиликка очиқланишини билдирган. Полша ҳозиргача йўқотилган 230 миллион долларлик бўнак пулини қайтаришга уринмоқда.
АҚШ президенти Доналд Трамп Венесуеланинг нефт захиралари Қўшма Штатлар назоратига ўтганини эълон қилганди. Томонлар ўртасидаги келишув 17 та стратегик нефт конини қамраб олган. Улардаги тасдиқланган захиралар 65 млрд баррелдан ошади, лойиҳаларга эса қарийб 100 млрд доллар хусусий инвестиция киритилиши кутилмоқда.