Полша Украина билан баллистик ракеталарга қарши коалицияга қўшилди
Полша Украина билан баллистик ракеталарга қарши коалицияга қўшилди
Полша Украина ва бошқа иттифоқчилар билан бирга баллистик ракеталарга қарши коалицияга қўшилди. Бу ҳақда 18-сентябр куни бош вазир Доналд Туск маълум қилди.
“Бугундан эътиборан Полша бу йирик лойиҳанинг бир қисмига айланди... Биз ушбу ҳамкорликнинг тамойилларини келишиб олдик”, деди Туск Х ижтимоий тармоғида жойлаштирилган видеода.
Туск шу куни Украина ғарбида бўлиб ўтган Карпат минтақасидаги саккизта мамлакатнинг янги минтақавий саммитида қатнашди. Бу саммит Украина президенти Владимир Зеленский томонидан йўлга қўйилган.
Украина ва Европанинг тўққизта мамлакати — Дания, Франсия, Германия, Италия, Нидерландия, Норвегия, Испания, Швеция ва Буюк Британия — июл ойида ҳаво мудофааси коалициясини эълон қилган эди. Ушбу тузилма АҚШнинг Патриот тизимига муқобил ва ундан арзонроқ ечим сифатида янги баллистик ракеталарга қарши тизимни биргаликда ишлаб чиқишни назарда тутади.
Туск саммитдаги матбуот анжуманида Полша Украина учун янги “салмоқли” ёрдам пакетини тайёрлаганини айтди, бироқ тафсилотларни ошкор этмади.
“Мен бу масалада жуда қатъийман. Украинани Россия тажовузидан ҳимоя қилиш борасидаги позициямизни ҳеч ким ўзгартира олмайди. Бугунги кунда тарих бизни Россия қаршисида бўлиб ташлай олмайди”, деди Туск.
Саммит доирасида Туск билан ўтказилган икки томонлама учрашувдан кейин Зеленский Полшага янги ёрдам пакети учун миннатдорчилик билдирди.
“Украина ва Полша кучли қўшнилар, дўстлар ҳамда ҳамкорлардир. Бизнинг душманимиз эса битта”, деб ёзди у Телеграмъда.