Полиция мигрантларни Сеута соҳилларидан кўчириш бўйича операцияни бошлади
Жума куни эрталаб полиция чодирли майдондан жой олиш учун тиқилинч юзага келтирган оломонни жиловлашга уринар экан, ҳавога қарата ўқ узгани хабар қилинди.
Полиция мигрантларни Сеута соҳилларидан кўчириш бўйича операция бошлади
Полиция Сеутадаги юзлаб мигрантларни Испаниянинг Шимолий Африкадаги ҳудуди портида жойлашган янги чодирли лагерга кўчиришни бошлади.
Бир неча ҳафта давомида соҳилларда яшаган одамлар лагердан жой олиш учун ёпирилиб келгач, ҳуқуқ-тартибот идоралари ходимлари оломонни тутиб туришга қийналдилар. Ўқ овозлари эшитилди ва полиция ҳавога қарата ўқ узгани ҳақида хабарлар тарқалди.
Ҳозирда 1700 кишига мўлжалланган лагерда бир неча юз мигрант жойлашган.
Июль ойида Марокаш билан чегарани кесиб ўтган 72 000 мигрантнинг аксарияти ортига қайтган, бироқ анклавда ҳали ҳам 13 000 дан ортиқ одам қолаётгани тахмин қилинмоқда.
Испаниянинг Efe давлат ахборот агентлиги хабарига кўра, операция жума куни маҳаллий вақт билан тахминан соат 07:00 да (Гринвич бўйича 05:00) бошланган ва унда 3000 дан ортиқ мигрант кўчирилган.
Кўчириш вақтида айрим мигрантлар портга олиб борадиган 2 км (1,2 миль) узунликдаги белгиланган йўналиш бўйлаб қўйилган тўсиқни ёриб ўтишган. Видеода полиция назоратни сақлаб қолишга уринаётган бир пайтда, қоронғуликда югураётган ёш йигитларни кўриш мумкин.
Efe хабарига кўра, операцияга 170 дан ортиқ полиция ходими, жумладан, дрон техниклари сафарбар этилган. Агентликнинг қўшимча қилишича, кейинроқ вазият "тезда назоратга олинган" ва операция давом эттирилган.
Ушбу операция ҳукуматнинг мигрантларни махсус муассасаларга йиғиш борасидаги саъй-ҳаракатларининг бир қисми бўлиб, у ерда уларнинг шахси аниқланади ва маъмурий мақоми индивидуал равишда ҳал этилгунга қадар уларга ғамхўрлик кўрсатилади.
Бу тартибсизликлар Испанияда инқирозни бартараф этиш борасидаги ҳаракатлари учун кескин танқидларга учраган Бош вазир Педро Санчесга нисбатан мухолифатнинг эътирозларини юмшатишга ёрдам бермайди.
Мигрантлар оқими бошланганидан бери 18,5 кв. км (7,2 кв. миль) майдонга эга ҳудуд аҳолиси хавфсизликдан хавотир билдирмоқда. Баъзилар бошпаналарни вайрон қилган ва мигрантларга ёрдам етказилишини тўсиб қўйган.
Сеута мэри Хуан Хесус Вивас шу ой бошида Европарламент депутатларига мигрантлар Сеутани "тезқозон"га (босим остидаги қозонга) айлантирганини айтди.
"Шаҳар бу воқеадан олдинги ҳолатидан бутунлай фарқ қилади, сеуталиклар қувончини йўқотди ва уларнинг турмуш тарзи бутунлай издан чиқди", деди консерватив мэр.
Мухолифат, шунингдек, Санчесни мигрантлар оқими ҳақида олдиндан билганликда айблади. Санчес буни олдиндан билиш имконсиз бўлганини айтган бўлса-да, ҳукумат ҳужжатларига кўра, разведка хизматлари воқеалардан бир кун олдин ижтимоий тармоқларда Сеутага оммавий равишда ўтишга чақириқлар бўлгани ҳақида огоҳлантирган.
Консерватив Халқ партияси вакили Эстер Муньос ҳукумат "Сеутага бостириб кирилиши ва ҳалок бўлганлар учун бевосита жавобгар" эканини айтди.
Бу воқеа Санчес учун дипломатик муаммоларни ҳам келтириб чиқарди.
Бош вазир Италия билан келишмовчиликка эга, икки давлат шу ҳафта бошида бир-бирига нисбатан жорий этилган вақтинчалик чегара назоратини узайтирди. У, шунингдек, Марокаш билан икки томонлама муносабатларни сақлаб қолишга ҳаракат қилмоқда.
Июль ойи охиридаги мигрантлар оқими Испания Олий суди Сеутага етиб олишга уринаётганда денгизда тўхтатилган мигрантларни Марокашга зудлик билан қайтариб юбориш мумкин эмаслиги ҳақида қарор чиқарганидан кейин юз берди.
Ушбу қарордан сўнг, баъзи ижтимоий тармоқлардаги аккаунтлар ёлғон маълумот тарқатиб, юзлаб фунт эвазига мигрантларга Испания чегарасини кесиб ўтишда ёрдам беришни таклиф қилишди.
Шундан сўнг минглаб одамлар чегара тўсиғи орқали ёпирилиб ўтишди ва океан тўсиқларини айланиб сузиб ўтишди. Маҳаллий ҳокимият органларига кўра, чегарани кесиб ўтиш пайтида камида 100 киши ҳалок бўлган.