Покистонда мактаб томи қулади. Ўнлаб қурбонлар бор
Ҳодиса вақтида мактабда 100 дан ортиқ ўқувчи бўлган.
Покистонда мактаб томи қулаб тушди. Ўнлаб қурбонлар бор
15-октабр куни Покистон шимоли-ғарбидаги Пешовар шаҳрида жойлашган хусусий мактаб томининг қулаши оқибатида ўнлаб ўқувчилар ҳаётдан кўз юмди.
Реутерс хабарига кўра, ҳодиса вақтида иккинчи ва учинчи синф ўқувчилари бўлган 34 нафар бола вайроналар остида қолиб кетган, қурбонлар орасида бир ўқитувчи ҳам бор.
Яна 50 киши турли даражада жароҳат олган, улардан бир нечасининг аҳволи оғир.
Шифохона маълумотига кўра, ҳалок бўлган ва жароҳатланган болаларнинг барчаси 6 ёшдан 12 ёшгача бўлган.
Қутқарув хизмати вакили айтишича, мактабнинг учинчи қавати томи ўпирилиб, учинчи ва иккинчи қаватлар орасидаги ёпма устига тушган, сўнг улар биргаликда синфхоналардаги ўқувчилар устига қулаган.
Қутқарувчилар воқеа жойига беш дақиқа ичида етиб келишган, бир неча соатдан сўнг қидирув-қутқарув ишлари якунланган.
Пешовар полицияси бошлиғи Миан Саид мактабда 110 нафар ўқувчи бўлганини маълум қилди. Унинг сўзларига кўра, мактаб мустаҳкам бўлмаган бинода фаолият юритиб келган. Мактаб эгаси ҳибсга олинган, у юз берган ҳодисада томга тушаётган юкни оширган ёмғирни айбламоқда.
Ассосиатед Пресс нашри Покистонда биноларнинг бундай қулаши тез-тез содир бўлишига, чунки қурилишда кўпинча сифациз материаллардан фойдаланилишига эътибор қаратган. Бироқ бугунги фожиа мамлакат тарихидаги энг йирик фожиа бўлди.
Маҳаллий расмийлар воқеа сабабларини текширадиган комиссия тузилганини эълон қилди.