Покистон Самарқанддаги шахмат олимпиадасида Исроилга қарши ўйнашдан бош тортди

**Покистон Самарқанддаги шахмат олимпиадасида Исроилга қарши баҳсдан воз кечди**

Самарқандда ўтаётган 46-Бутунжаҳон шахмат олимпиадасининг илк турида Покистон терма жамоаси Исроил вакилларига қарши ўйнашдан бош тортди. Тўртта досканинг барчасида партиялар ўтказилмагани сабаб Покистонга техник мағлубият ёзилди, Исроил эса 4:0 ҳисобида ғалаба қозонди.

Покистон шахмат федерацияси (СФП) раҳбарияти бу қарор мамлакат ҳукуматининг расмий сиёсатига мос келишини ва Фаластин халқи билан бирдамлик ифодаси сифатида қабул қилинганини билдирди.

“Биз давлат сифатида тан олмайдиган мамлакат билан қандай қилиб ўйнашимиз ёки алоқа қилишимиз мумкин? Бу бизнинг давлат сиёсатимиз. Биз бу ерда Покистон номидан иштирок этяпмиз ва унинг йўриқномаларига амал қилишимиз шарт. Бу қароримиз бирор спортчига ёки спорт тамойилларига қарши қаратилмаган”, деди федерация бош котиби Гавҳар Иқбол ЧессБасе Индиа нашрига берган интервюсида.

Шунингдек, федерация президенти Саид Зеешан Нақви бу бойкот орқали фаластинликларни қўллаб-қувватлаш мақсад қилинганини алоҳида таъкидлади.

Қайд этилишича, Покистон жамоаси Исроилга қарши ўйинга бирорта ҳам спортчисини туширмаган. Шунга қарамай, терма жамоа мусобақадаги иштирокини бошқа рақибларга қарши давом эттирмоқда.