Пўлат Бобожонов бошқа ишга ўтиши муносабати билан Президент Администрациясидаги лавозимидан озод этилди

Пўлат Бобожонов бошқа ишга ўтиши муносабати билан Президент Администрациясидаги лавозимидан озод этилди

Пўлат Бобожонов бошқа ишга ўтиши муносабати билан Ўзбекистон Президентининг кадрлар масалалари бўйича маслаҳатчиси ўринбосари лавозимидан озод этилди. Тегишли фармонни Ўзбекистон Республикаси Президенти имзолади.

Қарор Президент Администрацияси тузилмасини мақбуллаштириш доирасида қабул қилинган.

Хусусан, Президент Администрацияси тузилмасида Президентнинг кадрлар масалалари бўйича маслаҳатчиси лавозими ва тегишли бўлинма тугатилди.

Шу билан бирга, айрим иш йўналишлари бошқа бўлинмалар ўртасида қайта тақсимланди. Хусусан, Комплаенс хизмати зиммасига давлат мукофотлари ва геральдика соҳасида ягона давлат сиёсатини юритиш масалалари қўшимча равишда юклатилди.

Маҳаллий давлат ҳокимияти органлари билан ҳамкорлик қилиш ва уларнинг фаолиятини мувофиқлаштириш ҳам Комплаенс хизматининг қўшимча вазифалари қаторига киритилди.

Яна бир ўзгариш Президентнинг вакиллик органлари, нодавлат нотижорат ташкилотлари ва ёшлар масалалари бўйича маслаҳатчиси бўлинмасининг иш йўналиши кенгайтирилиши бўлди. Унинг қўшимча вазифалари қаторига маҳалла институти фаолияти самарадорлигини янада ошириш киритилди.

Кадрлар ва таркибий ўзгаришлар Президент Администрацияси фаолиятини мақбуллаштириш доирасида унинг бўлинмалари ўртасида вазифаларни қайта тақсимлашни назарда тутади.