Перу Эрон билан дипломатик алоқаларни узди

Перу Эрон билан дипломатик алоқаларни тўхтатди.

Лотин Америкаси давлати Ташқи ишлар вазирлигининг баёнотига кўра, Перу ҳукумати Эрон сиёсатини қоралаб, мамлакат билан дипломатик алоқаларни узишга қарор қилди, деб хабар берди “РИА Новости”.

Баёнотда шундай дейилади: “Перу Республикаси ҳукумати тинчликка бўлган тарихий садоқати, халқаро ҳуқуққа ҳурмат ва демократия ҳимоясидан келиб чиқиб, Эрон Ислом Республикаси билан дипломатик муносабатларни узишга қарор қилди”.

Ташқи ишлар вазирлиги Перунинг Эрон томонидан Ҳормуз бўғозида ўрнатилган қатъий чекловлардан чуқур хавотирда эканлигини таъкидлади. Перу расмийларининг фикрича, бу чекловлар халқаро савдога салбий таъсир кўрсатган.

Перу, шунингдек, Эроннинг МАГАТЕ (ИАЕА/ Атом энергияси бўйича халқаро агентлик) фаолиятига тўсқинлик қилаётганини қоралади. Агентлик инспекторларининг ядровий обьектларга киришига бир неча бор рухсат берилмагани қайд этилди.

Дипломатик муносабатлар узилганига қарамай, Лотин Америкаси мамлакати Эрондаги ўз фуқароларига консуллик хизматларини кўрсатишда давом этишни режалаштирмоқда. Аввалроқ Никарагуа Италия билан дипломатик алоқаларини кутилмаганда узгани ҳақида хабар берилганди. Бунга Италия собиқ бош вазирининг ўлдирилишига алоқадор шахсни экстрадиция қилиш билан боғлиқ низо сабаб бўлган.