Паркент-Тошкент йўналишида янги электропоезд қатнови йўлга қўйилди
Паркент-Тошкент йўналишида янги шаҳарлараро электропоезд қатнови бошланди. Йўловчилар 50 дақиқада манзилга етиб бориши мумкин, чипта нархи катталар учун 10 минг сўмгача, 10 ёшгача бўлган болалар учун 6,5 минг сўм этиб белгиланди.
Паркент-Тошкент йўналишида янги электропоезд қатнови йўлга қўйилди
7-сентабрдан бошлаб Паркент-Тошкент-Паркент йўналишида шаҳарлараро электропоезд йўловчиларга хизмат кўрсата бошлади.
Мазкур қатнов Ўзбекистоннинг транспорт-логистика тизимини ривожлантиришга қаратилган чора-тадбирлар доирасида “Байтқўрғон-Паркент” темир йўл линияси қурилиши якунлангач йўлга қўйилди.
Лойиҳа доирасида 24 километр узунликдаги электрлаштирилган темир йўл, 3 та темир-бетон кўприк, 1 та автомобил йўл ўтказгичи, 76 та сув ўтказиш иншооти ҳамда 16 та автомобил ва темир йўл кесишмаси барпо этилди. Бундан ташқари, 50 ўринга мўлжалланган “Паркент” темир йўл бекати ҳам қурилди.
Янги электропоездда 586 та ўрин мавжуд бўлиб, у жами 1154 нафаргача йўловчини ташиш имкониятига эга. Чипта нархи катталар учун 10 минг сўмгача, 10 ёшгача бўлган болалар учун эса 6,5 минг сўм этиб белгиланган. Паркентгача бўлган йўл тахминан 50 дақиқа давом этади.
Янги темир йўл қатнови Паркент туманига боришни енгиллаштириши билан бирга, ҳудуднинг туристик салоҳиятини оширишга ҳам хизмат қилиши кутилмоқда.