Парашютдан сакрашдан тортиб фермерлик дам олишигача. Ўзбекистонда туризмнинг янги форматлари тақдим этилди
Парашютдан сакрашдан тортиб фермерлик дам олишигача. Ўзбекистонда туризмнинг янги форматлари тақдим этилди
Ўзбекистонда янги туристик объектлар ва дам олиш вариантлари — Марғилондаги мажмуа ва Паркент туманидаги агротуризмдан тортиб, Сирдарё вилоятидаги парашютдан сакрашгача бўлган йўналишлар намойиш этилди.
Янги объектлар тақдимоти Туризм қўмитасида бўлиб ўтди. Идора маълумотларига кўра, январ-август ойларида Ўзбекистонга 9,1 миллион нафар хорижлик турист ташриф буюрган — бу ўтган йилнинг шу даврига нисбатан 21,1 фоизга кўпдир. Бу даврда туристик хизматлар экспорти 4,6 миллиард долларга етиб, 53,5 фоизга ошди.
Янги йўналишлардан бири Марғилондаги «Burhoniddin Marginoniy» илмий-маърифий ва туристик мажмуаси бўлди. Унинг ҳудудида минора, Буюк ипак йўли барельефи, Мирзакарим Қутидор уйи, ҳунармандчилик бозори, палов маркази, кафе, ресторанлар ва меҳмонхона жойлашган. Меҳмонларга, шунингдек, анъанавий ҳунармандчилик — кулолчилик, дўппидўзлик ва бошқа маҳаллий ҳунарлар билан танишиш таклиф этилади.
Яна бир йўналиш Паркент туманининг Сўқоқ (Самсарак) қишлоғида ривожланмоқда. У ерда шаҳар ташқарисидаги дам олиш фермер хўжалиги билан бирлаштирилган: ҳудудда экоферма, мини-зоопарк, ресторан ва маҳаллий маҳсулотлар маркети ишлаб турибди, сув бўйида дам олиш зоналари мавжуд. Ташриф буюрувчилар балиқ овлашлари, кулолчиликда ўзларини синаб кўришлари ва маҳорат дарсларида қатнашишлари мумкин.
Сирдарё вилоятида эса туристларга бошқача формат — парашют спорти таклиф этилмоқда. Янги объектда йўриқчилар ҳамроҳлигида 1,2 минг, 2,5 минг ва 3 минг метр баландликдан мустақил ҳамда тандемда сакрашлар ташкил этилган. Бундан ташқари, экшн-камералар ёрдамида сакрашларни фото ва видеога олиш кўзда тутилган.
Туроператорлар маълумотларига кўра, республикага саёҳат қилишга бўлган талаб ўтган йилга нисбатан 65 фоизгача ошган.