Папага ўпка саратони операциясидан кейин қўшимча даволаниш талаб этилмайди
Тест натижалари унинг ташхиси локализация қилинган ўпка аденокарциномаси эканини тасдиқлади.
Папа Лев XIV ўпкасидаги саратон ўсимтасини олиб ташлаш бўйича операциядан сўнг ҳеч қандай қўшимча даволанишга муҳтож эмас, деб билдирди унинг шифокорлари.
Ватикан баёнотига кўра, операция пайтида олинган тўқималар бўйича ўтказилган текширувлар ўпка аденокарциномаси бўйича бошланғич ташхисни тасдиқлади ва касаллик маҳаллий хусусиятга эга эканини кўрсатди.
«Кейинги онкологик текширув ҳеч қандай қўшимча даволаниш талаб этилмаслигини тасдиқлади», — дейилади баёнотда.
71 ёшли понтифик операциядан тўрт кун ўтиб, дам олиш кунлари Римдаги Жемелли шифохонасини тарк этди ва ҳудуддан чиқиб кетаётиб, ўзига эзгу тилаклар билдирганлар билан суҳбатлашиш учун тўхтади.
Ушбу янгилик у шифохонани тарк этганидан бери чоршанба куни Муқаддас Пётр майдонида ўтказилган илк ҳафталик умумий аудиенцияси вақтида маълум бўлди.
13 октябрь куни ўтказилган 90 дақиқалик операция Папанинг ўнг ўпкаси пастки бўлагини олиб ташлашни ўз ичига олган эди.
Понтифик ҳафталик якшанба намози чоғида Муқаддас Пётр майдонидагиларга шифокорлар унинг ўпкасида тугунча аниқлашганини айтиб, ушбу муолажани бошдан кечиришини эълон қилган эди.
Ўшанда у бу ҳолат «эрта босқичда» аниқланганини айтган эди.
Ўша куни Ватикан унинг Россия томонидан қамал қилинган ва эгаллаб олинган Украинанинг Олешки шаҳрига озиқ-овқат ёрдами етказилиши учун ўт очишни тўхтатишга чақириш, шунингдек, «мулоқот ва тинчлик»ка ундаш мақсадида Россия президенти Владимир Путин билан телефон орқали гаплашганини маълум қилди.
Понтифик душанба куни Украина президенти Владимир Зеленский билан ҳам шунга ўхшаш телефон мулоқоти ўтказди.
Папага яқин манбалар, шунингдек, у ноябрь ойи бошига режалаштирилган Лотин Америкасига сафарини қолдирмасликка қатъий қарор қилганини илгари айтишган эди.