Ўзбекистонда банклар соф фойдаси бир йилда 68 фоизга кўпайди

Ўзбекистонда банкларнинг соф фойдаси бир йил ичида 68 фоизга ошди

Ўзбекистондаги банклар соф фойдаси бир йилда 5 трлн сўмга кўпайиб, 68 фоиз ўсди. Бу ҳақда Марказий банк ҳисобот берди.

2026-йил январ–июл ойларида мамлакатдаги тижорат банкларининг соф фойдаси 12,33 трлн сўмга етди. Бу кўрсаткич 2025-йилнинг шу даврида 7,33 трлн сўм бўлган.

Таҳлилларга кўра, банкларнинг асосий даромад манбаи ажратилган кредитлар бўйича фоизлардан шаклланмоқда. Хусусан, етти ойлик фоизли даромадлар 84,4 трлн сўмни ташкил этган (бир йил аввал 71,4 трлн сўм). Айни пайтда фоизли харажатлар 60,8 трлн сўмга тенг бўлган (бир йил олдин 49,8 трлн сўм). Фоизли маржа эса 23,6 трлн сўмни ташкил қилган.

Қайд этилишича, январ—июл ойларида банкларнинг фоизсиз даромадлари 61,5 трлн сўмга етган (йиллик ўсиш 20 трлн сўм). Фоизсиз харажатлар эса 20,3 трлн сўмни ташкил этган.

2026-йил 1-август ҳолатига кўра, банклардаги депозитлар ҳажми 482,7 трлн сўмга етди. Бу кўрсаткич 2025-йилнинг мос даврида 360,4 трлн сўм эди. Натижада йиллик миқдор қарийб 122 трлн сўмдан зиёдга, яъни 34 фоизга ошган. Банк тизими ажратган кредит қолдиғи эса 644,6 трлн сўмни ташкил этиб, бир йил олдингига нисбатан 68,4 трлн сўмга кўпайган.