Ўзбекистон ва Сурия ишбилармонлик алоқаларини кенгайтиради
Дамашқда Ўзбекистон ва Сурия томонлари савдо-сотиқни, инвестициявий ҳамкорликни кенгайтириш ҳамда тадбиркорлар ўртасида тўғридан-тўғри алоқаларни йўлга қўйиш масалаларини муҳокама қилдилар.
Ўзбекистон ва Сурия ишбилармонлик алоқаларини кенгайтириш ниятида
Дамашқда Сурия савдо палаталари иттифоқи ва Сурия иқтисодиётининг турли тармоқларида фаолият юритаётган 20 га яқин компания вакилларининг учрашуви бўлиб ўтди. Иштирокчилар савдо-иқтисодий алоқаларни ривожлантириш ва бундан аввал Бухорода бўлиб ўтган Ўзбекистон-Сурия бизнес-форумида эришилган келишувларни амалга оширишни муҳокама қилдилар.
Музокаралар икки мамлакат тадбиркорлари ўртасида февраль ойида бошланган мулоқотнинг давоми бўлди. Томонлар тўғридан-тўғри ҳамкорликни кенгайтириш ва аниқ қўшма лойиҳаларни амалга ошириш имкониятларини кўриб чиқдилар.
Асосий эътибор озиқ-овқат саноати, қурилиш материаллари ишлаб чиқариш, электротехника ва енгил саноатга қаратилди. Шунингдек, ушбу ва бошқа истиқболли йўналишлар бўйича тўғридан-тўғри ишбилармонлик алоқаларини ўрнатиш муҳокама қилинди.
Суриялик тадбиркорлар мамлакатдаги қайта тиклаш жараёнлари туфайли қурилиш материалларига бўлган талаб юқори эканини таъкидладилар. Шу муносабат билан улар Ўзбекистон қурилиш ва девелоперлик компаниялари билан ҳамкорлик қилишга қизиқиш билдирдилар.
Бундан ташқари, электротехника ва енгил саноат маҳсулотлари савдосини кенгайтириш масаласи муҳокама қилинди.
Ҳалаб шаҳридаги Ўзбекистон Савдо уйининг имкониятлари алоҳида кўриб чиқилди. Томонлар ундан икки томонлама савдони ривожлантириш, шунингдек, Суриянинг бошқа ҳудудларида ҳам шу каби савдо майдончаларини ташкил этиш истиқболларини баҳоладилар.
Суриялик тадбиркорлар кузда Тошкентда Савдо-иқтисодий ҳамкорлик бўйича Ўзбекистон-Сурия ҳукуматлараро қўмитасининг биринчи йиғилиши доирасида ўтказилиши режалаштирилган бизнес-форумда иштирок этишга таклиф қилинди.
Учрашув якунлари бўйича томонлар бизнес вакиллари ўртасида мунтазам равишда тўғридан-тўғри алоқаларни сақлаб туриш, ўзаро ишбилармонлик миссияларини ташкил этиш ҳамда икки мамлакат компанияларининг халқаро кўргазма ва ярмаркалардаги иштирокини кенгайтиришга келишиб олдилар.
Бундан ташқари, томонлар аниқ савдо ва инвестиция лойиҳалари устида ишлашни фаоллаштириш ниятида.