Ўзбекистон ССПнинг Грузиядаги вакили амалий учрашувлардан муайян битимларга ўтишга чақирди

Ўзбекистон ССПнинг Грузиядаги вакили амалий учрашувлардан муайян битимларга ўтишга чақирди

Ўзбекистон Савдо-саноат палатасининг Грузиядаги вакили Мака Нацвлишвили икки мамлакат ўртасидаги товар айланмасини 1 миллиард долларга етказиш мақсадини амбицияли, аммо тўлиқ эришиш мумкин бўлган вазифа деб ҳисоблайди. ТПП вакилининг сўзларига кўра, 2025 йилда ўзаро савдо ҳажми қарийб 267,6 миллион долларни ташкил этди, бу эса белгиланган даражага чиқиш учун уни деярли тўрт бараварга ошириш кераклигини англатади.

Нацвлишвили тайинлов тўғрисидаги сертификатни 2026 йил 27 октябрда Палата раиси Даврон Ваҳобов топширган. У Business Shop LLC консалтинг платформасининг асосчиси ва бошқарувчи директори, шунингдек Грузиядаги EurAsia Gulf бош менежеридир. Унинг бизнесни ривожлантириш, халқаро савдо ва инвестицияларни жалб қилиш соҳасидаги тажрибаси 14 йилдан ошади.

Интервьюда у ўзининг касбий йўли, янги лавозимдаги вазифалари, икки мамлакат ўртасидаги иқтисодий муносабатларнинг ҳолати, устувор йўналишлар ва савдо мақсадига эришиш учун зарур бўлган қадамлар ҳақида сўзлаб берди.

**Сизни ушбу лавозимга олиб келган касбий йўлингиз ва фаолиятингиздаги асосий босқичлар ҳақида сўзлаб берсангиз.**

Менинг касбий йўлим 14 йилдан ортиқ вақт давомида бизнесни ривожлантириш, халқаро савдо, инвестицияларга кўмаклашиш, харидлар, стратегик бошқарув ва халқаро лойиҳаларни амалга ошириш соҳаларида шаклланди.

Ушбу давр мобайнида мен турли соҳаларда ва бизнес муҳитларида ишладим. Бу менга компаниялар қандай тузилгани, бозорлар қандай ривожланаётгани ва энг муҳими, бизнес имкониятларини барқарор тижорат натижасига қандай айлантиришни амалий тушуниш имконини берди.

Мен Business Shop LLC — бизнес хизматлари ва консалтинг платформасининг асосчиси ва бошқарувчи директориман. У компанияларни бизнесни ривожлантириш, бозорларга чиқиш, инвестиция лойиҳалари, халқаро савдо, харидлар ва стратегик шерикликлар масалаларида комплекс қўллаб-қувватлайди.

Бундан ташқари, мен Грузиядаги EurAsia Gulf бош менежериман. Бу Кавказ, Марказий Осиё ва Форс кўрфази минтақасидаги тадбиркорлар, инвесторлар ва институтларни бирлаштирувчи халқаро бизнес платформасидир. Грузия Инвестиция палатаси ва бошқа халқаро бизнес ташаббусларидаги иштирок институционал ҳамкорлик, инвестицияларни илгари суриш ва чегаралараро бизнес алоқалари соҳасидаги тажрибамни кенгайтирди.

Каолиятимда саноат ишлаб чиқариши, харидлар, корпоратив сотувлар ва операцион фаолиятда, шу жумладан CaucasEnergo, Embawood Georgia ва ABD & Co компанияларида бошқарув тажрибаси ҳам бўлган. Бу стратегик ва операцион экспертизани бирлаштиришга имкон берди.

Менинг ривожланишимда халқаро иқтисодий ҳамкорликда, энг аввало, Грузия, Марказий Осиё, Европа ва Кўрфаз мамлакатлари ўртасида бизнес алоқаларини ўрнатишда иштирок этиш ҳал қилувчи роль ўйнади.

Бу йўлда Ўзбекистон билан ҳамкорлик алоҳида ўрин тутади. Институционал ҳамкорлик, бизнес ташаббуслари ҳамда давлат ва хусусий сектор вакиллари билан бевосита мулоқот орқали мен диққатимни мамлакатларимизнинг амалий иқтисодий ҳамкорлигига айланиши мумкин бўлган имкониятларни излашга тобора кўпроқ қаратдим.

Мен ҳамиша халқаро бизнес — бу шунчаки алоқалар ўрнатиш эмас, деб ҳисоблаганман. Бу турли бозорлар манфаатларини тушуниш, бир-бирини тўлдирувчи имкониятларни излаш ва узоқ муддатли ҳамкорлик учун шароит яратишдир.

Шу сабабли, Ўзбекистон Савдо-саноат палатасининг Грузиядаги вакили этиб тайинланишим менинг йўлимнинг табиий давоми бўлди. У менинг тажрибам, халқаро алоқаларим ва иқтисодий шерикликни ривожлантиришга бўлган узоқ йиллик содиқлигимни бирлаштиради.

**Тайинловингиз қандай амалга ошди ва асосий вазифаларингиз нималардан иборат?**

Менинг тайинланишим Ўзбекистон Республикасининг Грузия ва Озарбайжонда аккредитациядан ўтган элчихонасининг фаол иши, қўллаб-қувватлаши ва изчил саъй-ҳаракатлари билан чамбарчас боғлиқ.

Элчихонанинг иқтисодиётларни яқинлаштириш, институционал мулоқотни мустаҳкамлаш ҳамда Ўзбекистон ва Грузия ўртасидаги амалий ҳамкорликни илгари суришдаги муҳим ролини алоҳида таъкидламоқчиман.

Элчихонанинг икки мамлакат бизнес ҳамжамиятларини яқинлаштиришдаги ташаббускор иштироки, тегишли институтлар билан алоқаларни ўрнатишга ёрдам бериши ва икки томонлама иқтисодий ташаббусларни қўллаб-қувватлаши ушбу тайинлов учун муҳим асос бўлди.

Мен буни нафақат касбий тажрибам ва халқаро бизнес соҳасидаги меҳнатимнинг эътироф этилиши, балки Ўзбекистон ва Грузия томонлари ўртасида ортиб бораётган ишонч ва ҳамкорликнинг акси сифатида ҳам кўраман.

Элчига ва бутун дипломатик жамоага ўз ишига содиқлиги, очиқлиги ва Грузия билан иқтисодий алоқаларни мустаҳкамлашга қўшган ҳиссаси учун чин қалбимдан миннатдорлик билдираман. Уларнинг иши дипломатик институтлар мустаҳкам икки томонлама муносабатларни муайян бизнес ва инвестиция имкониятларига айлантиришда қандай роль ўйнашини кўрсатади.

Халқаро бизнес платформаларидаги ишимда, энг аввало, Business Shop ва EurAsia Gulf’да, шунингдек Грузиядаги инвестиция ташаббусларида мен изчил равишда компаниялар, инвесторлар ва институтларни боғлаш ҳамда чегаралараро шерикликларни ўрнатишга ёрдам бериш билан шуғулландим.

2026 йил 27 октябрда мен Ўзбекистон Республикаси Савдо-саноат палатаси раиси Даврон Ваҳобов топширган тайинлов тўғрисидаги расмий сертификатни олиш шарафига муяссар бўлдим.

Мен ушбу тайинловда касбий муваффақиятни ҳам, катта масъулиятни ҳам кўраман.

Менинг асосий мақсадим — Ўзбекистон ва Грузия ўртасида самарали институционал ва бизнес кўприги бўлишдир. Мен Элчихона, Ўзбекистон Савдо-саноат палатаси, Грузия институтлари ва хусусий сектор билан яқин мувофиқликда ишлайман.

Менинг мажбуриятларим бир нечта асосий йўналишларга қаратилган.

Биринчиси — савдони ривожлантириш. Мен ўзбекистонлик ишлаб чиқарувчилар ва экспортчиларга Грузияда ва бошқа халқаро бозорларда имкониятларни топиш ва тижорат алоқаларини ўрнатишда ёрдам бераман.

Иккинчиси — инвестицияларга кўмаклашиш. Вазифа инвесторлар ва компанияларни иккала мамлакатдаги мос лойиҳалар, бизнес шериклар ва институционал иштирокчилар билан боғлашдан иборат.

Учинчиси — бизнес вакиллиги. Мен Грузия бозорига чиқишдан манфаатдор бўлган Ўзбекистон компанияларини қўллаб-қувватлайман ва Грузия бизнесига Ўзбекистонда имкониятлар излашга ёрдам бераман.

Тўртинчиси — институционал ҳамкорлик. Гап савдо палаталари, давлат органлари, бизнес ассоциациялари ва хусусий ташкилотлар ўртасидаги коммуникацияни мустаҳкамлаш ҳақида бормоқда.

Бешинчиси — B2B ва B2G форматларидаги бизнес-миссиялар ва учрашувлар. Мен мақсадли бизнес-миссиялар, соҳавий учрашувлар, инвестиция мулоқотлари ва бевосита музокараларни ташкил этиш ниятидаман.

Олтинчиси — саноат ва тижорат шерикликлари. Бу қўшма корхоналар, ишлаб чиқариш кооперацияси, дистрибуция келишувлари ва технологиялар алмашинувини қўллаб-қувватлашдир.

Мени, айниқса, доимий ва тузилмалашган бизнес мулоқотини яратиш, шу жумладан икки томонлама бизнес кенгашини шакллантириш ва унинг самарали ишлаши қизиқтиради.

Менинг ишим асосида бир принцип ётади: нетворкинг (алоқалар ўрнатиш)дан битимлар тузишга ўтиш керак. Ҳамкорлик муваффақиятини ўтказилган учрашувлар ва тадбирлар сони билан эмас, балки тузилган шерикликлар, имзоланган контрактлар, жалб қилинган инвестициялар ва янги бозорларга муваффақиятли чиққан компаниялар билан ўлчаш лозим.

**Ўзбекистон-Грузия муносабатларининг ҳозирги ҳолатини, хусусан иқтисодиёт соҳасида қандай баҳолайсиз?**

Мен Ўзбекистон-Грузия муносабатлари стратегик иқтисодий ривожланишнинг жуда истиқболли босқичига киради, деб айтган бўлардим.

Мамлакатларимизда мустаҳкам пойдевор мавжуд: сиёсий мулоқот, ўзаро ҳурмат ва ортиб бораётган институционал ҳамкорлик. Шу билан бирга, менинг фикримча, иқтисодий потенциал ҳозиргача эришилган ҳамкорлик даражасидан сезиларли даражада юқори.

Сўнгги йиллардаги прогресс умид бахш этади. 2017 йилдан 2025 йилгача икки томонлама товар айланмаси тахминан уч бараварга ошди ва 2025 йилда қарийб 267,6 миллион долларни ташкил этди.

Мамлакатларимиз ўртасидаги эркин савдо режими муҳим рақобатбардош афзаллик беради, бевосита авиақатновлар ва минтақавий транспорт инфратузилмасининг ривожланиши эса бизнес учун қўшимча имкониятлар очади.

Ўзбекистон Президенти Шавкат Мирзиёевнинг 2026 йил июль ойида Грузияга амалга оширган давлат ташрифи икки томонлама муносабатларни мустаҳкамлашда муҳим босқич бўлди. Икки мамлакат етакчиларининг музокаралари ҳамкорликни анъанавий савдо чегараларидан ташқарига кенгайтириш бўйича қатъий ниятни кўрсатди.

Товар айланмасини 1 миллиард долларга етказиш мақсади ҳам иккала мамлакатнинг анча чуқурроқ иқтисодий шерикликка чиқиш интилишини акс эттиради.

Шунга қарамай, менинг ишончим комилки, кейинги босқич амалий амалга оширишга бағишланиши керак. Бизга компаниялар ўртасида кўпроқ бевосита алоқалар, жипсроқ саноат кооперацияси, кўпроқ инвестицион фаоллик ва бир-бирининг бозорларида муваффақиятли ишлаётган кўпроқ компаниялар керак.

Грузия Ўзбекистон бизнесига Қора денгизга чиқиш, ривожланган логистика инфратузилмаси ва халқаро савдо битимларини таклиф қилиши мумкин. Ўзбекистон, ўз навбатида, салмоқли саноат, қишлоқ хўжалиги ва ишлаб чиқариш салоҳиятига эга бўлган йирик ва жадал ривожланаётган бозордир.

Мен ушбу муносабатларда шунчаки икки томонлама савдони эмас, балки Кавказ, Марказий Осиё, Европа ва Форс кўрфази минтақаси ўртасида кенгроқ иқтисодий боғлиқликни барпо этиш имкониятини кўраман.

**Икки мамлакат ҳамкорлигининг қайси йўналишларини устувор деб ҳисоблайсиз?**

Мен ҳамкорлик сезиларли иқтисодий натижа бериши мумкин бўлган бир нечта стратегик соҳаларни кўряпман.

**Савдо, ишлаб чиқариш ва тўқимачилик**

Бу энг истиқболли йўналишлардан биридир. Ўзбекистонда мустаҳкам ишлаб чиқариш базаси мавжуд, айниқса тўқимачилик, кийим-кечак, пойабзал ва бошқа саноат товарлари соҳасида. Грузия ўзбекистонлик ишлаб чиқарувчилар учун Кавказ, Қора денгиз бўйи ва Европа бозорларига чиқишда тижорат ва логистика майдончасига айланиши мумкин.

Грузия компаниялари, ўз навбатида, ўзбекистонлик ишлаб чиқарувчилар билан шерикликлар яратиши, қўшма ишлаб чиқаришларни очиши ва дистрибуция тармоқларини ўзлаштириши мумкин.

Менинг фикримча, ҳамкорлик тайёр маҳсулот экспорти доирасидан чиқиб, қўшма ишлаб чиқариш, хусусий брендлар остида маҳсулот чиқариш, технологиялар алмашинуви ва юқори қўшилган қийматга эга маҳсулот яратишни ўз ичига олиши керак.

**Транспорт, логистика ва минтақавий боғлиқлик**

Грузиянинг георафик жойлашуви Марказий Осиёни Қора денгиз ва Европа бозорлари билан боғлашда муҳим роль ўйнайди.

Ўрта коридор, Транскаспий халқаро транспорт маршрути, Боку — Тбилиси — Карс темир йўли, шунингдек Поти ва Батуми портлари янада самарали савдо йўналишлари учун яхши имкониятлар яратади.

Грузияда, айниқса Поти порти ва эркин саноат зонаси атрофида Ўзбекистон логистика ва савдо хабининг ташкил этилиши Ўзбекистон экспортини оширишнинг муҳим инструменти бўлиши мумкин эди.

**Қишлоқ хўжалиги ва озиқ-овқат маҳсулотлари ишлаб чиқариш**

Қишлоқ хўжалиги ишлаб чиқариши, маҳсулотларни қайта ишлаш, совуқ ҳолда сақлаш, қадоқлаш, агротехнологиялар ва экспортни ривожлантиришда салмоқли потенциал мавжуд.

Ўзбекистоннинг қишлоқ хўжалиги имкониятлари ва Грузиянинг қатор аграр маҳсулотлар, озиқ-овқатни қайта ишлаш ва халқаро бозорларга чиқишдаги тажрибаси бир-бирини тўлдириши мумкин.

Узумчилик, мева ва сабзавотларни қайта ишлаш, ёнғоқ (фундук) етиштириш, чорвачилик ва агрологистикадаги қўшма лойиҳалар алоҳида эътиборга лойиқдир.

**Энергетика ва инфратузилма**

Яна бир муҳим йўналиш — энергетика инфратузилмаси, қайта тикланадиган энергетика, энергия самарадорлиги ва муҳандислик лойиҳаларидир.

Иккала мамлакат ҳам техник тажриба алмашиш, инвестицияларни жалб қилиш ва инфратузилмани ривожлантиришга хусусий компанияларни жалб қилишдан манфаат кўриши мумкин.

**Туризм ва меҳмонхона бизнеси**

Туризм нафақат сайёҳлар оқимини ошириш, балки қўшма туристик маҳсулотлар яратиш, меҳмонхоналарга инвестиция киритиш, меҳмонхона секторидаги шерикликлар ва туроператорлар ҳамкорлиги учун ҳам имкониятлар очади.

**Инвестициялар ва саноат кооперацияси**

Мен инвестицияларни муносабатларимизнинг энг муҳим узоқ муддатли ўлчовларидан бири деб ҳисоблайман. Грузия ва Ўзбекистон компанияларини қўшма корхоналар, ишлаб чиқаришлар, дистрибуция компаниялари ва бошқа тижорат нуқтаи назаридан барқарор лойиҳаларни яратишга ундаш керак.

Инсон капиталини ривожлантиришни алоҳида ажратиб кўрсатмоқчиман. Саноат ҳамкорлиги малакали кадрларсиз мумкин эмас. Касбий тайёргарлик, касб-ҳунар таълими, техник тажриба алмашиш ва кадрлар билан тизимли ишлаш иқтисодий шериклигимизнинг ажралмас қисмига айланиши керак.

Охир-оқибат, менимча, шунчаки товар алмашишга эмас, балки интеграциялашган қиймат яратиш занжирларини барпо этишга интилиш керак.

**Ўзбекистон ва Грузия товар айланмасини 1 миллиард долларга етказиш мақсадини қўйди. Бу қанчалик реал ва қайси муддатларда?**

Мен 1 миллиард долларлик мақсадни амбицияли, аммо иккала мамлакат унга шунчаки рақам сифатида эмас, балки стратегик иқтисодий дастур сифатида қараса, эришиш мумкин бўлган вазифа деб ҳисоблайман.

2025 йилда икки томонлама товар айланмаси қарийб 267,6 миллион долларни ташкил этди. 1 миллиард долларга чиқиш учун уни деярли тўрт бараварга ошириш керак.

Бу жиддий вазифа, аммо, ўйлашимча, бундай ўсиш учун иқтисодий бир-бирини тўлдириш ва имкониятлар етарли.

Муҳим масала савдо кўрсаткичларини ошира олишимизда эмас, балки ушбу ўсишни барқарор қиладиган иқтисодий механизмларни қандай яратишдадир.

Менинг фикримча, бунинг учун аниқ йиллик мўлжаллар ва соҳалар бўйича ўлчанадиган мақсадларга эга ўрта муддатли истиқбол керак. Аниқ муддатлар ихтиёрий равишда белгиланган сиёсий муддатда эмас, балки биргаликда келишилган ҳаракатлар режасида белгиланиши лозим.

1 миллиард долларга чиқиш учун мавжуд товарлар экспортини оширишнинг ўзи етарли эмаслигини ҳам тушуниш керак. Товарлар ва хизматларни диверсификация қилиш, янги экспорт категорияларини ривожлантириш, саноат кооперацияси ва қўшма ишлаб чиқаришни кенгайтириш, иккала йўналишда инвестиция оқимларини ошириш, амалдаги эркин савдо режимидан янада тўлиқ фойдаланиш, логистика ва дистрибуция инфратузилмасини ривожлантириш ҳамда ишлаб чиқарувчилар, улгуржи савдогарлар ва чакана тармоқлар ўртасида жипсроқ бевосита алоқалар талаб этилади.

Грузиядан нафақат сотув бозори, балки Ўзбекистон маҳсулотлари учун бошқа халқаро бозорларга чиқиш дарвозаси сифатида фойдаланиш айниқса муҳимдир. Шунингдек, Ўзбекистон Марказий Осиёда ўз иштирокини кенгайтиришни истовчи Грузия компаниялари учун муҳим майдончага айланиши мумкин.

Таъкидлаб ўтаманки, товар айланмаси — иқтисодий ҳамкорлик кўрсаткичларидан бири, холос. Муваффақиятнинг ҳақиқий мезони инвестиция лойиҳаларини, қўшма корхоналарни, технологиялар трансферини, иш ўринлари яратилишини ва компанияларнинг бир-бирининг бозорларида узоқ муддатли иштирокини ҳам ўз ичига олиши керак.

**Унга эришиш учун иккала мамлакатга қандай қадамлар керак? Бизнес доиралари ва савдо палаталари қандай роль ўйнаши мумкин?**

1 миллиард долларга эришиш учун ҳамкорлик тўғрисидаги умумий декларациялардан мувофиқлаштирилган амалий амалга ошириш стратегиясига ўтиш керак. Мен бешта зарур қадамни ажратиб кўрсатган бўлардим.

Биринчиси: тузилмалашган икки томонлама бизнес механизмини яратиш. Компаниялар, инвесторлар, савдо палаталари, соҳавий ассоциациялар ва тегишли давлат органларини бирлаштирадиган доимий майдонча керак. Икки томонлама бизнес кенгаши соҳавий имкониятларни белгилаши, бизнес муаммоларини ҳал қилиши ва келишилган ташаббуслар бажарилишини кузатиб бориши мумкин эди.

Иккинчиси: умумий нетворкинг-тадбирлари ўрнига мақсадли бизнес-миссияларни ташкил этиш. Миссияларни иштирокчи компанияларнинг реал тижорат манфаатлари атрофида қуриш керак. Уларнинг ҳар биридан олдин компаниялар нимани сотиб олмоқчи, сотмоқчи, ишлаб чиқармоқчи, нимага инвестиция киритмоқчи ёки биргаликда ривожлантирмоқчи эканини аниқлаш лозим. Шундоқ экан, ташкилотчилар тегишли B2B ва B2G учрашувларини уюштиришлари, потенциал шерикларни таништиришлари ва бевосита музокараларга ёрдам беришлари мумкин бўлади. Мақсад — шунчаки одамларни бир залига йиғиш эмас, балки ўлчанадиган тижорат натижасини олишдир.

Учинчиси: бозорларга киришни ва экспортни илгари суришни мустаҳкамлаш. Компанияларга тартибга солиш, сертификатлаш, божхона тартиб-омиллари, сотув каналлари, солиққа тортиш ва бозор талаблари ҳақида амалий ахборот керак. Грузия компанияларининг Ўзбекистондаги кўргазмалар ва бизнес-форумларда иштирок этишини рағбатлантириш ҳамда Грузияда ўзбекистонлик ишлаб чиқарувчилар ва уларнинг маҳсулотларини фаол илгари суриш лозим.

Тўртинчиси: қўшма саноат ва инвестиция лойиҳаларини ривожлантириш. Иккала мамлакат тижорат потенциалига эга муайян лойиҳаларни, шу жумладан тўқимачилик ишлаб чиқариши, озиқ-овқат маҳсулотларини қайта ишлаш, логистика, энергетика, қурилиш ва саноатни белгилаб олиши керак. Бизнесни қўшма корхоналар яратишга ҳамда Грузиянинг эркин савдо тўғрисидаги битимлари ва унинг халқаро тижорат алоқаларидан қўшимча бозорларга чиқиш учун фойдаланиш йўлларини излашга ундаш лозим.

Бешинчиси: инсон капитали ва институционал ҳамкорликка инвестиция киритиш. Касбий тайёргарлик, технологиялар алмашинуви ва малакали кадрлар тайёрлаш барқарор саноат ўсиши учун зарурдир. Савдо палаталари, шунингдек, кадрлар тайёрлаш бозорнинг реал талабига жавоб бериши учун таълим муассасалари, касб-ҳунар таълими марказлари ва хусусий компаниялар ўртасида алоқа ўрнатиши керак.

Ўзбекистон Савдо-саноат палатасининг Грузиядаги вакили сифатида мен ўз ролимни ушбу жараёнда фаол иштирок этишда кўраман: имкониятларни излаш, керакли шерикларни боғлаш, институционал мулоқотга кўмаклашиш ва лойиҳаларни дастлабки муҳокамалардан тортиб амалий амалга оширишгача кузатиб бориш.

Шунингдек, Грузия ва Ўзбекистон анъанавий икки томонлама формат чегараларидан чиқиши керак, деб ҳисоблайман. Биз биргаликда Марказий Осиё, Кавказ, Қора денгиз ва Форс кўрфази минтақасини боғлайдиган мустаҳкамроқ иқтисодий коридорни барпо этишимиз ҳамда компанияларга янги бозорлар ва халқаро инвестицияларга чиқиш имкониятини очишимиз мумкин.

Менинг вазифам оддий: мен кўпроқ Ўзбекистон маҳсулотлари Грузия орқали халқаро бозорларга муваффақиятли чиқаётганини, кўпроқ Грузия компаниялари Ўзбекистонда ўз иштирокини очаётганини ва қўшма лойиҳалар иккала мамлакатда реал иқтисодий қиймат яратаётганини кўришни хоҳлайман.

1 миллиард долларлик мақсад якуний нуқта бўлмаслиги керак. У анча чуқурроқ ва амбицияли иқтисодий шериклик учун бошланғич нуқтага айланиши лозим.

Мустаҳкам институционал қўллаб-қувватлаш, фаол дипломатик иштирок, жалб қилинган бизнес ҳамжамияти ва натижага қаратилган амалий ёндашув мавжуд бўлганда, биз ушбу амбицияни реал иқтисодий ҳақиқатга айлантира олишимизга ишонаман.