Ўзбекистон Сенати чегарадаги туннеллар учун жавобгарликни кучайтирди
Ўзбекистон Сенати давлат чегараси орқали ер ости туннелларини қуриш ва улардан фойдаланганлик учун жавобгарликни кучайтирувчи ўзгартиришларни маъқуллади.
Ўзбекистон Сенати чегарадаги туннеллар учун жавобгарликни кучайтирди
Ўзбекистон Сенатининг 19-ялпи мажлисида давлат чегараси орқали ноқонуний ер ости туннелларини қуриш ва улардан фойдаланиш учун жиноий жавобгарликни кучайтиришни назарда тутувчи қонун кўриб чиқилди. Сенаторлар ушбу қонунни маъқулладилар.
Ўзгартиришлар киритиш зарурати, хусусан, трансмиллий жиноятчиликнинг янги шакллари пайдо бўлаётгани билан изоҳланади. Давлат чегарасини кесиб ўтувчи ер ости туннелларининг қурилиши ҳамда улардан кейинчалик ноқонуний фойдаланилиши шундай таҳдидлардан бирига айланди.
Муҳокама давомида 2016 йилдан 2025 йилгача бўлган даврда Ўзбекистон давлат чегарасида 12 та ноқонуний ер ости туннели аниқлангани таъкидланди. Улар ёрдамида мамлакатга кўп миқдордаги товарлар, валюта ва бошқа бойликларни ноқонуний олиб киришга уринишлар бўлган. Сенаторлар бундай ҳолатлар давлат чегараси дахлсизлигига, иқтисодий хавфсизликка ва миллий манфаатларга таҳдид солишини таъкидладилар.
Қабул қилинган ўзгартиришлар давлат чегараси орқали ўтувчи ноқонуний туннеллар ва бошқа ер ости инфратузилма объектларини қуриш ва улардан фойдаланиш учун алоҳида жиноий жавобгарликни жорий этади. Шунингдек, бундай фаолиятни ташкил этиш ёки молиялаштириш учун ҳам жавобгарлик белгиланмоқда.
Шу билан бирга, давлат чегарасини ноқонуний кесиб ўтиш ва бундай иншоотлардан фойдаланган ҳолда контрабанда жиноятларини содир этиш учун жазо чоралари кучайтирилмоқда.
Қонунда инсонпарварлик тамойилига асосланган қоидалар ҳам мустаҳкамланган. Бундай қилмишни биринчи марта содир этган шахс, агар у давлат органларига ноқонуний туннел ҳақида ихтиёрий равишда хабар берса ёки жиноятни очишга фаол ёрдам берса, жиноий жавобгарликдан озод қилиниши мумкин. Бунда унинг ҳаракатларида бошқа жиноят таркиби бўлмаслиги керак.
Жиноят-процессуал кодексига ҳам ўзгартиришлар киритилди. Янги нормаларга кўра, давлат чегараси орқали ноқонуний ер ости туннелларини қуриш ва улардан фойдаланиш билан боғлиқ жиноятлар бўйича дастлабки терговни Давлат хавфсизлик хизмати органлари терговчилари олиб боради.
Сенаторларнинг фикрича, янги нормалар бундай жиноятларни тезкорлик билан аниқлаш ва самарали тергов қилиш учун қўшимча ҳуқуқий асос яратади. Қонун, шунингдек, трансмиллий уюшган жиноятчиликка қарши курашиш самарадорлигини ошириш ҳамда миллий ва иқтисодий хавфсизликни мустаҳкамлашга қаратилган.
Сенаторлар қонуннинг қабул қилиниши давлат чегараси дахлсизлигини таъминлашга, шунингдек, мамлакатда тинчлик ва барқарорликни янада мустаҳкамлашга хизмат қилишини таъкидладилар.