Ўзбек нави, Андижон техникаси: Беларусда саримсоқпиёз етиштириш бошланди
Беларуснинг Витебск вилоятида Ўзбекистондан келтирилган «Қизил май» навли кузги саримсоқпиёз тажриба тариқасида экилмоқда. Ўзбек агрономлари иштирок этаётган лойиҳа учун 2,5 гектар майдон ажратилган. Дастлабки ҳосилни 2027-йил июлида йиғиб олиш режалаштирилган.
Ўзбек нави, Андижон техникаси: Беларусда саримсоқпиёз етиштириш бошланди
«Дунё» ахборот агентлигининг Беларус ОАВга таяниб хабар беришича, тажриба Витебск туманидаги «Олговское» ишлаб чиқариш кооперативи далаларида олиб борилмоқда. Бу хўжаликда Ўзбекистондан келтирилган мазкур нав илк бор экилмоқда.
Саримсоқпиёз экиш учун унумдор ва юмшоқ тупроқли майдон танланган. Экиш жараёни ўзбек агрономлари ва маҳаллий мутахассислар томонидан биргаликда назорат қилинмоқда.
Ишларда Андижон вилоятида фаолият юритувчи «Техмаш» қўшма корхонасининг махсус экиш техникалари қўлланилмоқда.
Мутахассислар Беларус иқлимида қайси экиш усули энг юқори ҳосил беришини аниқлашни мақсад қилган. Шу сабабли 75 сантиметрли икки қаторли ва 40 сантиметрли уч қаторли экиш схемалари синовдан ўтказилмоқда.
«Олговское» кооперативи бош агрономи Олга Яковлеванинг сўзларига кўра, экилган саримсоқпиёзнинг ривожланиши мунтазам кузатиб борилади. Биринчи ҳосилни келаси йил июлида олиш режалаштирилган.
Шу мавсумда Л. Доватор номидаги Улла давлат коллежи далаларида ҳам Ўзбекистон саримсоқпиёзи экилиши кўзда тутилган.
Агентлик Витебск вилояти билан Ўзбекистон ҳудудлари, хусусан, Андижон ўртасида қишлоқ хўжалиги ҳамкорлиги фаоллашаётганини таъкидлаган. Аввалроқ Витебск вилоятида ўзбек фермерларига картошка етиштириш учун 2 минг гектар ер ажратилгани ва чорвачилик бўйича қўшма лойиҳалар бошланганини хабар қилинган эди.