Ўн йилда бир тушадиган кадр: Гватемала ўрмонида ягуар тасвирга олинди
Гватемала ва Ҳондурасни боғловчи табиий ўрмон йўлагида эркак ягуар фототузоққа тушди. Табиат ҳимоячиларига кўра, бу ҳудудда шундай кадрларни олиш тахминан ўн йилда бир марта насиб этади. Суратлар инсон таъсири кучайиб бораётганига қарамай, ягуарлар мазкур йўлакдан ҳали ҳам фойдаланаётганини кўрсатмоқда.
Ўн йилда бир марта учрайдиган кадр: Гватемала ўрмонида ягуар тасвирга тушди
Фототузоқлар ёввойи мушуксимонларни муҳофаза қилиш билан шуғулланувчи Пантҳера ташкилоти ҳамда Гватемаланинг муҳофаза этиладиган ҳудудлар бўйича миллий кенгаши — СОНАП томонидан ўрнатилган.
Пантҳераънинг ягуарларни асраш дастури директори Эллисон Девлин ва ташкилотнинг Ҳондурасдаги бўлими раҳбари Франклин Кастаньеда Пеопле нашрига бундай суратлар жуда кам олиниши ҳақида айтган. Уларнинг сўзларига кўра, бу кадрлар кўплаб таҳдидларга қарамай, ягуарлар минтақада яшашда давом этаётганининг муҳим исботидир.
Гватемала ва Ҳондурас чегараси бўйлаб ўтувчи табиий йўлак Белиз, Гватемала ва Мексикадаги ягуар популяцияларини Ҳондураснинг марказий ҳамда шарқий қисмидаги гуруҳлар билан боғлайди.
Бундай боғлиқлик ҳайвонлар гуруҳларининг бир-биридан ажралиб қолиши ва яқин қариндошлар ўртасида чатишиш хавфини камайтиради. Ўрмонларнинг парчаланиши эса уларнинг ҳаракатини чеклаб, алоҳида популяцияларни янада заифлаштириши мумкин.
Материалдаги баҳоларга кўра, дунёдаги ягуарларнинг тахминан 89 фоизи Амазонка ҳавзасида яшайди. У ердаги йирик популяция турнинг умумий ҳолатига катта таъсир кўрсатади. Гватемала ва Ҳондурас каби ҳудудлардаги кичик, ажралиб қолган гуруҳлар эса янада жиддий хавфларга дуч келмоқда.
Гватемалада ягуарларнинг тарқалиши аввал асосан Петен ўрмонлари билан боғланган эди. Янги кузатувлар эса мамлакат шарқидаги Сьерра-де-лас-Минас тоғлари ва Кариб денгизи соҳили бўйлаб жойлашган Изабал табиий йўлагида ҳам бу ҳайвонлар борлигини кўрсатмоқда.
Табиат ҳимоячилари учун нодир кадрларнинг аҳамияти яширин ҳаёт кечирувчи йиртқични суратга олиш билангина чекланмайди. Улар, шунингдек, ягуарлар ҳаракатлана оладиган узлуксиз ўрмон ҳудудларини сақлаб қолиш зарурлигини ҳам кўрсатади.