Озодлик флотилияси тўхтамоқчи эмас. Кўнгиллиларнинг навбатдаги гуруҳи Ғазога сузади
Озодлик флотилияси тўхташ ниятида эмас. Кўнгиллиларнинг навбатдаги гуруҳи Ғазога йўл олади
Озодлик флоти коалицияси Исроилнинг Ғазога қарши денгиз блокадасини бузишга қаратилган навбатдаги халқаро миссия бошланганини маълум қилди. Ташкилотга кўра, кемалар Европадаги бир қатор портларга кириб, октябр ойида Ғазо қирғоқларига етиб боришга уринади.
Коалиция янги миссияни аввалги уринишларда фаоллар ҳибсга олингани ва зўравонликка дуч келганига қарамай амалга оширишга қарор қилган. Ташкилот Исроил кучлари олдинги миссияларда фаолларни калтаклагани, электрошокер ишлатгани, ҳатто жинсий зўравонлик содир этганини даъво қилмоқда. Коалиция, шунингдек, Исроил Ғазога озиқ-овқат, дори-дармон ва ёнилғи киришини чеклаётганини айтиб, халқаро ҳамжамиятни бу масалага бефарқ бўлмасликка чақирди.
“Озодлик флотилияси яна денгизга чиқмоқда, чунки ҳукуматларимиз ҳамон ўз мажбуриятларини бажаргани йўқ”, деди ташкилот бошқарув қўмитаси аъзоси Зоҳар Чамберлаин Регев.
Маълум қилинишича, Ҳандала ИИ кемаси июн ва июл ойларида Норвегия, Швеция ва Данияга ташриф буюрган. Кате кемаси эса шу ой бошида Буюк Британиянинг Бристол шаҳридан йўлга чиқиб, Ирландия, Германия ва Франсияда тўхтаган. Флотилия Ғазога йўл олишдан олдин Испания, Португалия ва Италия портларига ҳам киради.
Миссияда инсон ҳуқуқлари ҳимоячилари, касаба уюшмалари фаоллари, журналистлар, тиббиёт ходимлари ва Фаластинни фаол қўллаб-қувватловчи бошқа соҳа вакиллари қатнашмоқда. Ҳар бир портда маҳаллий аҳоли билан учрашувлар ва жамоатчилик тадбирлари ўтказилиши режалаштирилган.
Ташкилот ҳукуматлардан Исроилга қурол-яроғ ва энергия ресурслари етказиб беришни тўхтатиш, дипломатик ва ҳарбий ҳамкорликни чеклаш ҳамда санксиялар жорий этишни сўради. Шунингдек, флотилия кемаларига хавфсиз ва тўсқинликларсиз ҳаракатланиши учун шароит яратишни талаб қилди.
“Ғазо томон сузиш жиддий хавф туғдиришини биламиз. Аммо сукут ва ҳаракацизлик фаластинликлар ва бутун дунё учун бундан ҳам катта харажатга олиб келади”, деди миссия иштирокчиси, америкалик муҳандис Эдвард Дижилио.
Озодлик флотилияси бундан аввал ҳам бир неча бор Ғазога денгиз орқали етиб боришга уринган. Бироқ Исроил кучлари халқаро фаолларни тўхтатиб, ҳибсга олган. Хусусан, 2010-йилда Исроил ҳарбийлари Мави Мармара кемасига бостириб кириши оқибатида 10 нафар фаол ҳалок бўлган.
2025-йилда ташкил этилган Глобал Сумуд флотилияси ҳам Исроил кучлари томонидан тўхтатилган. Ташкилот маълумотларига кўра, камида 15 та қайиқ босиб олинган ва бортдаги фаоллар ҳибсга олинган. 2026-йилда ҳам айни ссенарий такрорланган.