Ўзбекистонга туристлар энг кўп қайси давлатлардан келмоқда?
2026-йилнинг январ–июл ойларида Ўзбекистонга туристик мақсадларда 7,7 млн нафардан ортиқ чет эл фуқароси ташриф буюрди. Туристлар оқими бўйича Қирғизистон, Қозоғистон ва Тожикистон етакчилик қилмоқда.
Ўзбекистонга сайёҳлар асосан қайси мамлакатлардан келмоқда?
Миллий статистика қўмитасининг маълумотларига кўра, жорий йилнинг дастлабки етти ойида Ўзбекистонга жами 7 749 308 нафар хорижий фуқаро туристик мақсадларда ташриф буюрган. Бу кўрсаткич ўтган йилнинг мос даврига нисбатан 1,4 миллион нафарга ёки 22,6 фоизга кўпроқдир.
Ўзбекистонга энг кўп сайёҳ Қирғизистондан келган бўлиб, етти ой ичида уларнинг сони 2 177 108 нафарни ташкил этган. Кейинги ўринларда Қозоғистон (1 855 562 нафар) ва Тожикистон (1 728 978 нафар) қайд этилган.
Шунингдек, Россиядан 710 824 нафар, Афғонистондан 281 200 нафар ва Хитойдан 269 735 нафар сайёҳ Ўзбекистонга ташриф буюрган. Туркманистондан келганлар сони 192 830 нафарни, Туркиядан эса 111 908 нафарни ташкил этган. Топ-10 рўйхатига Ҳиндистон (32 462 нафар) ва Корея (26 512 нафар) ҳам киритилган.
Шундай қилиб, Ўзбекистонга туристик мақсадларда келган хорижликларнинг асосий қисми қўшни Марказий Осиё давлатлари ҳиссасига тўғри келмоқда.